Ohcá davvisámegielat jietnaneavttáriid
Internášunála Sámi Filbmainstituhtta (ISFI) ohcá davvisámegielat jietnaneavttáriid neaktit Studio Ghibli, Spirited Away - guhkes animašuvnnas.
ISFI dieđiha preassadieđáhusas ahte sii lágidit njeallje geahččaleami, rollaid ektui, ja vuosttaš dain lágiduvvui Romssas gaskavahku dán vahkkus. Odne, bearjadaga 21.09, lea nubbi vejolašvuohta Romssas searvat geahččaleapmái. Geahččaleapmi lágiduvvo NRK Troms studios.
Guovdageainnus
Goalmmát ja njealját geahččaleamit leat Guovdageainnus disdaga 02.10.2018 ja gaskavahku 03.10.2018 dát lágiduvvojit Internášunála Sámi Filbmainstituhtas, Buletjávrris.
Davvisámegielagat
ISFI dárbbaha iešguđegelágan neavttáriid, sii ohcet nieidda gii lea sullii 10-15-jahkásaš ja bártni gii lea veaháš boarrásit go nieida, sullii 12-18-jahkásaš. Dasa lassin sii dárbbahit ovtta nissonolbmo gii lea birrasiid 60-75-jagi ja dievdoolbmo gii lea birrasiid 40-50-jagi. Buot neavttárat galget leat davvisámegielagat.
Geahččaleapmi
Geahččaleapmi lágiduvvo jietnastudios, gos neavttár geahččaladdá neaktit osiid filmmas, ja dat maiddái báddejuvvo. Juohke neavttárii biddjo sullii 45-60 minuhta áigi ja mánusa oažžu báikkis gos bádden dáhpáhuvvá.