Skodi Rein vuittii fas bálkkašumi
Dán háve vuittii Skodi Rein ges nuppi saji Arktalaš árvoháhkan gilvvus, iežaset goikenjuovččabuktagiin.
– Lea máilmmi somá vuoitit, go juo leat bargame dainna hommáin. Lea movttiidahtti ja buktá buori beaggima sihke alccemet ja maid obbalaččat boazodollui, dadjá fitnodaga eaiggát Karen Utsi Sara, gii lei váldime vuostá bálkkašumi Romssas mannan vahkus.
Goikeguolli vuosttažin
NHO Reiseliv Davvi-norgga guovllusearvi dat juohká dán bálkkašumi juohke jagi, fitnodahkii mas lea buoremus borramušhutkkus. Vuosttaš saji vuittii Tørrfisk fra Lofoten, iežaset goikeguollepáhkain. Bálkkašupmái árvvoštallet sihke hutkáivuođa, olggoža, mágu ja obbalaččat makkár lea olggosoaidnit.
Ieža sádden sisa
Skodi Rein oažžu nuppi saji dán bálkkašumis iežaset goikaduvvon njuokčamiin.
– Sihke buvtta ja olggoš čájeha Davvi-norgga árbevieruid ja identitehta hirbmat buori vuogi mielde. Muttágis dimis ja buorre kon- sisteansa, ja muttágit sálti. Dás háliida eambbo, ja jurys šattai vuolagoiku! Nie čállet sii preassadieđáhusas.
Goalmmát saji vuittii Lofoten Umami, mii lea máistta (krydder) Lofoten Seaweed Companys fitnodagas.
Karen Utsi Sara muitala sii leat ieža sádden buktaga dán gilvui, ja nu leat maiddái daidda eará gilvvuide main leat vuoitán bálkkašumiid. (Geahča sierra čállosa maid sii leat vuoitán)
Olu vuoitán
Skodi Rein fitnodat njuovvá Finnmark Rein njuovahagas, ja ruovttus Jergolis leat sis rusttegat main goikadit nugo njuokčamiid ja bierggu. Sii leat olu olahan dan rájes go ráhkadišgohte biergobuktagiid bohccobierggus. Olu leat sii maid geahččaladdan ovdal go leat gávnnahan movt ráhkadit iešguđet buktagiid bohccos.
– Dál leat máŋggaid jagiid geahččaladdan ja heivehallan, ja mis lea olles bearaš leamaš fárus máistime ja árvvoštallame leago njálggat vai heittot. Mánát han dadjet njuolga leago heittot vai njálggat. Neahttasiidduide gal leat ožžon veahki, ja neahttaovdanbuktima mii leat ain buorideame ja ođasteame. Jáhkán das lea maid olu ávki, dadjá Karen Utsi Sara.