Vuolgá nuppe beallai ábi iskat fámuid
Norggameašttir čáhcekrossas, Morten Blien, vuolgá USA:I gilvalit, fárrui váldá vel iežas «ođđa» skohtera.
Beakkán čáhcecrossvuoddji Morten Blien lea dál ráhkkaneame vuolgit Eppingii New Hapsurii USA:I, gos lágiduvvojit čáhcecrossagilvvut. Vuolgga lea golggotmánu 1. beaivvija bearjadaga álget gilvvut.
– Dál lean páhkken ja sádden skohtera, illudan sakka beassat iežan skohteriin gilvalit doppe. Dál dieđán sihkkarit makkár vuoján mus lea, man hálddašan buorebut, lohká dovddus čáhcecrossavuoddji Morten Blien.
Molson mohtora
Ii leat vuohččan go Morten Blien vuolgá USA:I vuodjit čáhcecrossa, muhto lea vuohččan go váldá iežas skohtera mielde. Ovddit háve, go lei don bealde ábi iskamin fámuid, ii loga nu bures mannan, muhto lohká dál lea stuorát doaivva go iežas vuojána váldá fárrui.
– Lean bovdejuvvon vuodjit gilvvuide, muhto ii leat leamašan vejolašvuohta ovdal go dál vuolgit. 2016:s vudjen luoikkas skohteriin, ja mearridin dalle ahte jus fas vuolggán, de galgá iežan skohter mielde. Diibmá ii lean vejolašvuohta go mu skohteris lei beare stuorra mohtor, inge háliidan luoikkahit. Dál ožžon vejolašvuođa molsut mohtora ja dál mii dollet, lohká Blien. Su mielde vulget viđas ja lohká issoras dehálažžan ahte leat olbmot mielde joavkkus go lea gilvaleamen.
Mihttu ja ulbmil leat buoremusaid searvvis
Mannan geasi molssui vel skohtermearkka Polarisas Arctic Catii, ja vaikko lea ollu rahčan mannan geassi, de gilvoáigodaga loahpas luovvanii ja nu faskii maiddái Norggameašttir-namahusa dán jagi Guovdageainnus.
– Skohter manná bures, illudan geahččalit fámuid. Leat ollu stuorát gilvvut USA:S go dáppe Eurohpás. Mu ulbmil lea čájehit ahte mii Eurohpás maid máhttit ja leat mielde gilvaleamen buoremusaid searvvis. Mihttu lea dieđusge beassat njunnošii gilvvus, nu go álohii lea, lohká Morten Blien.
Ovdamunni
Son lohká ráhkkanan nu go dábálaččat ja lohká buot vuddjiin ballat.
– In dieđe geat gilvalit, muhto buohkain lea seamma hárjáneapmi ja lea veaháš dan duohken geas lea rivttes beaivvi. Vuodjit USA:S lean dieđusge sakka čiekŋudan oválavuodjimii, muhto illudan issorasat gilvalit, lohká son. Morten Blien sávvá ahte su vásáhus ovddit háve go finadii USA:S vuodjimin lea ovdamunni go dál galgá fas ođđasit gilvalit.
Morten Blien háliida loahpas giitit buohkaid geat leat dagahan vejolažžan ollašuhttit niegu vuolgit USA:I gilvalit iežas skohteriin.