Rápmi konfirmánttaid váhnemiidda

Dađi bahábut leat dan áigge sámi komfirmašuvnnat šaddan njuolgut šovvan mas mánát geavahuvvojit čájáhusdohkkán álbmogii.

Guovdageainnu konfirmánttaid váhnemat leat mearridan ahte sin mánát galget konfirmerejuvvot vilges gárvvuiguin. Suohkanbáhppa Bjarne Gustad jáhkká máŋgasii sáhttá leat lossat go fokus lea čiŋaide maid lea nu divrras oastit dasa lassin go doalut maid gártet divrrasin. Son dadjá ge girku bealis ilus go ii biddjo šat eambbo noađđi váhnemiidda go lea dárbu. Mii jáhkkit dán jierpmálaš mearrádussan, go sámi konfirmašuvnnat leat dan áigge šaddan nu issoras divrrasin, go konfirmánta galgá čiŋahuvvot divraseamos čiŋaiguin oaivečohkas juolgevuđđui. Dasa lassin lea nu mot suohkanbáhppa lohká, de galget vel stuorra doalut maidda bovdejuvvojit čuđiid mielde guossit. Dat eahpitkeahttá šaddá beare ollu muhtun váhnemiidda.

Fertet maiddái muitit ahte eai buot váhnemat sáhte ieža duddjot dahje bivdit lagas fulkkiid veahkehit. Gal de juo ipmirda ahte šaddá mearehis divrrasin bálkáhit duddjot buot čiŋaid konfirmántii dasa lassin go šaddá oastit boaluid, riskkuid, rohkiid ja eará golle- ja silbačiŋaid. Ii ge dieđus okta ge váhnen hálit iežas máná čiŋahit ovdamearkka dihte unnit hervejuvvon gávttiin dahje eará čiŋaiguin mat leat ovdal leamaš anus. Dušše dan dihte vai mánná ii dárbbaš dan gullat ja šaddat ságavuollái. Dađi bahábut leat dan áigge sámi konfirmašuvnnat šaddan njuolgut šovvan mas mánát geavahuvvojit čájáhusdohkkán álbmogii. Nu garrasit ferte dan dadjat vai šaddá fuopmášupmi man badjelmearálaš dán áigge leat konfirmašuvnnat.

Ii ge dan sáhte duoljevuollái duorggaid sisa čiehkat, ahte sámiid suohkaniin lea stuorra mánáidgeafivuohta, earret eará leat Kárášjoga ja Guovdageainnu suohkanat bajimusaid searvvis dan suivadis listtus. Ii ge dat ge leat amas ášši, ahte jahkásaččat šaddet muhtun váhnemat ohcat ruhtaveahki Nav-vuogádagas konfirmašuvnnaide. Dat dieđus muitala ahte konfirmašuvnnat leat ekonomalaš noađđin, go čiŋat ja doalut leat šaddan nu guovddážii. Áigut ge rámidit daid váhnemiid geat leat arvan mearridit dan, ahte boahtte jagi galget sin mánát konfirmerejuvvot vilges gárvvuiguin.

Daid konfirmašuvnnaid vilges gárvvuin lea ge symbolan, ahte buot olbmuin lea seamma árvu. Eahpitkeahttá vilges gárvvut dagahit unnit noađi váhnemiidda, muhto dalle ferte maiddái mearriduvvot, ahte konfirmánttat govvejuvvojit joavkogovvii daid gárvvuiguin. Seammás sávvat eará sámi suohkaniid maid čuovvolit Guovdageainnu, ja sávvat ge ahte sii leat dál láidestan eará sámi suohkaniid rievttes geidnui. Ii dat leat amas ášši ahte dán áigge sámi konfirmánttaid biktasiid stuđerejit olbmot hui dárkilit ja dollet sága sin čiŋaid birra guhká maŋŋel konfirmašuvnnaid.