Sis-finnmárkui ferte maid girdišillju
Guovdageainnu suohkanstivra galgá meannudit girdišilju ášši boahtte čoahkkimis. Dan birra lea ge ollu sáhka leamaš, ahte divvut dálá girdiseaivunbáikki. Lea dan láhkai ahte Guovdageainnus lea dál juo báiki masa girdit sáhttet seaivut, muhto dat lea čievra seaivunbáiki, ii ge leat mot ge doaimmas. Eai ge dasa dieđus sáhte stuorebuš girdit seaivut. Guhká lea leamaš ságas, ahte Avinor hukse Guovdageidnui girdišilju, muhto guorahallamis leat gávnnahan ahte dat ii leat gánnihahtti. Guovdageainnu suohkan ii leat vuollánan dainna, go sis lea juo sullii 2,8 miljovnna ruvnna «girdišilljofoanddas». Dál áigu ge Guovdageainnu suohkan bivdit Áibmojohtolatbearráigeahču dohkkehit, ahte Hánnomaras girdišilju galgá lohpi geavahit kommersiealla doaimmaide. Das lea ge ságas dan birra, ahte ráhkadit dakkár girdišilju mii sáhttá geavahuvvot gearggusvuhtii, ambulánsii ja táksigirdimii. Dakkár girdišillju lea olu lagabus olamuttos, go huksegoahtit stuorra girdišilju. Juste dan dihte lea olamuttos, go das eai leat seamma gáibádusat go dábálaš girdišiljus. Lea áibbas čielggas ahte Sis-finnmárku maid dárbbaša girdišilju, vaikke ii oro menestuvvame dakkár šillju gosa stuora «charter-girdit» sáhttet seaivut. Liikká lea dakkár girdišillju buorre gosa sáhttá ambulánsagirdi seaivut, go dat han lea iešalddis juo oadjebasvuohta obmuide go dákkár girdišillju ásahuvvošii siseatnamii. Earenoamážit lea dat dehálaš Guovdageidnui mii lea dál dakkár stuorebuš sámi báiki gos lea guhkes mátki buot girdišiljuide. Dušše dat lea doarvái ágga ahte Guovdageidnui huksejuvvo albma girdišillju mas lea asfáltavuođđu ii ge sáttovuođđu nu mot dál lea, ja muđui buot čuovggat ja rusttegat mat dárbbašuvvojit.
Dat lea áibbas čielggas ahte Sis-finnmárku maid dárbbaša girdišilju, vaikke ii oro menestuvvame dakkár šillju gosa stuora «chartergirdit» sáhttet seaivut.
Das dieđus maiddái lea sáhka, ahte dan girdišilju galgá sáhttit geavahit kommersiealla doaimmaide, namalassii sáhtostit olbmuid nu gohčoduvvon táksigirdiin. Dakkár girdimis eai ge leat nu garra gáibádusat go dábálaš sáhttogirdiin. Juste dan galgá ge suohkanstivra meannudit, ahte geavahit 600 000 ruvnno gávdnan dihte aktevrra mii sáhttá čađahit dan dárbbašlaš proseassa oažžut sadjái konsešuvnna ja teknihkalaš operatiiva dohkkeheami Guovdageainnu girdišilju váste. Dat lea hui álkit olamuttos, ja dasa lea ovdamearkan Trysil girdišillju man measta ráhkadedje eaktodáhtolaš bargguin. Ii ge šaddan máksit go sullii miljovnna ruvnna. Dan birra muitala ge pilohta Per Gunnar Stensvaag Guovdageainnu Lagasradios, ahte mot sii veahkkálaga ráhkadedje buori doaibmi girdišilju. Lea ge buorre ovdamearka ahte lea vejolaš ráhkadit girdišilju masa sáhttet táksigirdit seaivut.