HÁLIIDA EAMBBO maŋŋel viđát saji
Joachim Olsen lea leamaš Amerihkás, Fremontas New Hampshireis, gilvvohallamin máilmmi stuorimus čáhce-cross gilvvus, «Race into winter». Doppe manai nu bures ahte Olsen háliida eambbo.
Joachim Olsen lea jo measta guokte vahkku leamaš Amerihkás. Son manai buori áiggis dohko vuoi beassá hábmet ja ordnet skohtera máid luoikkahii juste nu go ieš háliida dan. Son lea beassan vuodjit ja geahččaladdat, son lea bártidan ja sus leat leamaš ollu hommát. Goitge lea son dál hirbmat movttet.
– Mun lean vuodján ja gilvalan luoikkas skohteriin mainna in leat báljo beassan hárjehallat. Mii leat gilvvuid vuolde divodan ja mudden skohtera, ja das dieđus lea riska go dan bargá. Muhto mii deaivvaimet bures, ja dá lei ođđa vásáhus, muitala Olsen telefovnnas Amerihkás.
Gilvvuin ledje birrasiid 400 oasseváldi ja badjel 40.000 geahčči ledje čoahkkanan geahččat, nu ahte ii leat duššiid dihte máilmmi stuorimus čáhce-cross gilvu.
Viđádin
Joachim Olsen vujii golbma gilvvu mannan vahkkoloahpa go ledje gilvvut. Bearjadaga vuodjimiin ii mannan nu bures ja sotnabeaivvi vuosttaš vuodjimiin lei nu gohčoduvvon «dragrace» gos lea ulbmil vuodjit njuolga ovddos ja jođáneamos lágiid mielde ollet mollii. Dán gilvvus Olsen ollii beallefinálii. Muhto deháleamos gilvu bođii sotnabeaivvi eahkeda, ja de gal Olsen oaččui leavttu.
– Dál mus lea buorre dovdu, buot bargu ja hommá ii leat leamaš duššái. Go bealle finálas ollejin mollii, de ledje measta ganjalčalmmit. Mus lei dakkár vuoitodovdu dušše dainna go bessen mielde loahppagilvui. Lean hirbmat duhtavaš, luoikkas skohteriin nagodin vuodjit viđát sadjái, dadjá Olsen.
Joachim Olsen vujii skohteriin mas lea dábálaš mohtor. Su iežas skohteris, mii lea Kárášjogas, leat ollu eambbo heastafámut go dan skohteris mainna vujii Amerihkás.
– Sis geainna mun gilvalin, leat skohterat main leat sihkkarit 50 heastafámu, go dan skohteris mainna dál vudjen. Livččii dieđusge somá iežan skohteriin gilvalit dáppe, muhto dat lea hui divrras, dan oažžut mielde deike. Mun in duostta vástidit livččen go vuodján buoret iežan skohteriin, muhto dovdu goit livččii leamaš buoret ovdal gilvvu, dadjá Olsen.
Badjelgeahččan
Čáhce-cross lea ollu stuorát Amerihkás go Norggas ja muđui Eurohpás. Vuoittut leat buorebut ja gilvaleaddjit leat eambbo. Olsen muitala neahtas oaidnán go Amerihkás gilvvohallet, ja son lea dál vásihan ahte Eurohpás dáidet badjelgeahččan sin gilvaleddjiid Amerihkás.
– Gal mii dáidit badjelgeahččan Amerikanáriid. Mun ferten gal mieđihit ahte máilmmi buoremus vuoddjit leat dáppe. Vuoittut leat maid mihá buorebut go ruovttus lávejit. Mun šadden viđádin ja vui- ten 400$ (Sullii 3460,- Norgga ruvnno), muitala Olsen.
Joachim Olsen lea vel moadde beaivvi Amerihkás ovdal go máhccá ruoktot, dál lohká áigut dušše vuoiŋŋastit ja návddašit luomu.
– Mun lean ožžon fálaldaga boahtit ruovttoluotta, deike gilvvohallat. Dát lei nu somás vásáhus ahte jáhkán vuolgit ruovttoluotta boahtte jagi fas, loahpaha Olsen.