– Lean jurddašan goas dát šattašii duohtan
Sámi girječálliid searvvis illudit go ráđđehus árvala juolludit ruđaid jorgalit sámi girjjiid dárogillii.
Ráđđehus evttoha boahtte jagi stádabušeahtas juolludit 2 miljovnna ruvnnu ásahit ođđa ortnega Norgga kulturfondii mii galgá geavahuvvot jorgalit sámi girjjiid dárogillii ja lasihit sámi girjjálašvuođa gaskkusteami. Ođđa ortnet lea dehálaš sámi girječálliide.
– Sámi girječálliide lea hirbmat buorre go girjjit beaggigohtet eará gielaide. Midjiide lea leamaš stuora hástalus go girjjit eai jorgaluvvo ja go dása juolluduvvojit unnán ruđat. Dássážii lea mis leamaš vejolašvuohta ohcat Davviriikkaid ministarráđi jorgalandoarjagiid, muhto doppe ii oaččo ruđa galli girjái, dadjá Sámi girječálliid searvvi jođiheaddji Inga Ravna Eira.
Besset mielde oastinortnegii
Sámi girječálliid searvi lea olu fámuid geavahan oččodit dákkár ortnega man ráđđehus dál árvala ásahit.
– Lean jurddašan goas dát šattašii duohtan. Lean hirbmat movttet go ođđa ortnet ásahuvvo ja searvvi bealis váldit dán bures vuostá. Dál beassat mielde Kulturfoandda oastinortnegii ja dat mearkkaša ahte jorgaluvvon sámi girjjit ostojuvvojit buot girjerádjosiidda, lohká Eira.
Olahit eará sámiide
Go sámi girjjit jorgaluvvojit dárogillii, de lea dás ávki sihke sámiide ja dáččaide.
– Dalle olahit sámiide geat leat massán gielaset ja dat lea hui dehálaš, lohká Sámi girječálliid searvvi jođiheaddji Inga Ravna Eira.
Sámi girjjálašvuohta šaddá maiddái dehálaš diehtogáldun go jorgaluvvo dárogillii.
– Sámiid birra leat unnán dieđut ja dáččat dadjet váttisin dáid gávdnat. Go sámi girjjálašvuohta jorgaluvvo dárogillii, de lea dá okta vuohki oahpásmuvvat sámiide. Go lohket maid sámit čállet, de soitet šaddat sáhkkin ja ohcagohtet vel eanet dieđuid. Ná lassána diehtu sámiid birra, lohká Eira.
Kulturárbi
Norgga kulturministtar Trine Skei Grande dadjá ahte sii háliidit ođđa ortnegiin dovddusin dahkat sámi girjjálašvuođa.
– Mii háliidit váikkuhit ahte sámi girjjálašvuohta sáhttá gaskkustuvvot buohkaide Norggas. Sámi girjjálašvuohta lea dehálaš oassi min oktasaš kulturárbbis, ja go dan dahká olámuttos eanet olbmuide, de sáhttit mii, geat eat máhte sámegiela, buorebut oahpásnuvvat sámi kultuvrrain, dadjá kulturministtar Trine Skei Grande preassadieđáhusas.