Ođasredaktevra ferte máhttit sámegiela
Sámi Journalisttaid Searvi čujuha dasa ahte NRK Sápmi aiddo lea almmuhan ođasredaktevravirggi rabasin. Mii leat min Sámi Journalisttaid Searvvis oaidnán ja gullan ahte NRK Sámi jođiheaddji ii gáibit sámegielmáhtu sus gii biddjo ođasredaktevran, iige virgealmmuhusas ge daddjo mihkkege dan birra ahte ohcci fertešii máhttit sámegiela. SJS lea hirpmástuvvan go sámi stuorámus mediaásahus duššindahká sámegielmáhtu ja gelbbolašvuođa ja njeaidá min gielas árvvu. Eahpitkeahttá lea nu ahte ođasredaktevra ferte máhttit sámegiela jos NRK mihtus nannet sámegiela galggaš makkárge oaivil.
Sámi Journalisttaid Searvvis mii vuohttit ja oaidnit ahte NRK Sámi fálaldagas orru dárogiella vuoruhuvvomin, ja dál lea nuppi geardde oanehis áiggis ahte NRK Sápmi ii vuorut sámegielmáhtu virgebidjamiid oktavuođas, vaikko gávdnošedje nana sámegielat ohccit virggiide.
SJS ii oainne ahte NRK Sápmi daguiguin nanne sámegiela geavaheami ja árvvu nugo sámi servodat gáibida ja vuorddášii. Dat lea šállošahtti ja dat dahká ain eanet áigeguovdilin gáibidit nannoseappo sámi stivrejumi sámi mediaid badjel. Dat livččii maiddái Ovttastuvvan Našuvnnaid eamiálbmotjulggaštusa ulbmila mielde, nannemis eamiálbmogiid iešmearrideami iešguđetge servvodatsurggiin.
Sámi Journalisttaid Searvi ávžžuha NRK Sámi rahpat ođasredaktevravirggi ođđasit ja bidjat gáibádussan ahte son guhte galggaš virggi oažžut, galgá máhttit sámegiela bures, sihke njálmmálaččat ja čálalaččat. SJS bivdá maid NRK Sámi vuoruhit sámegiela geavaheami iežas doaimmahuslaš ja hálddahuslaš bargguin.