– Ii atte olus vejolašvuođa ovdánahttit fálaldaga
Boahtte jagi stádabušeahtas evttohuvvo lasihit sámi aviissaide preassadoarjaga 2,38 proseanttain.
Ráđđehus árvala stádabušeahtas juolludit 28 770 000 ruvnno preassadoarjjan sámi áviissaide. Dát lea 2,38 proseantta lassáneapmi diimmážis, go diimma stádabušeahtas juolluduvvui 28,1 miljovnna ruvnno seamma ulbmilii.
– In duđavaš supmiin
Ávvira váldodoaimmaheaddji Kari Lisbeth Hermansen ii loga iežas duđavažžan daid supmiiguin mat leat almmuhuvvon.
Vaikko preassadoarjja leage lassánan 640 000 ruvnnuin, de ii leat dat doarvái gokčat sámi aviissaid dárbbuid, oaivvilda son.
– Vuosttažettiin de lean dieđusge duđavaš go ráđđehus lasiha doarjaga sámi aviissaide, muhto in heađisge leat duđavaš dainna supmiin maid lasihit, lohká Hermansen.
Unnit go haddegoargŋun
Statistihkalaš guovddášdoaimmahaga loguid mielde lea konsumahaddeindeaksa 3,4 proseantta. Konsumahaddeindeaksa čájeha dábálaš viessodoaluid gálvvuid haddeovdáneami. Stádabušeahtas fas boahtá ovdan ahte haddegoargŋun lea meroštallojuvvon 2,7 prosenttii ollislaččat dán jahkái.
Dát mearkkaša ahte vaikko sámi aviissaid preassadoarjja leage lassánan 2,38 proseanttain, de ii dat lassáneapmi govčča haddegoargŋuma ge.
– Seamma doaibmadási doalahit
Hermansen lea beahtahallan go leat evttohan nu unnán juolludit sámi aviissaide preassadoarjaga, ja jáhkká heajos váikkuhusaid buktit, earret eará ahte eai beasa ovdánahttit fálaldagaset.
– Dat rievtti mielde ii leat lasáhus, go supmi ii govčča hadde- ja bálkágoargŋuma ge. Juolludemiin beassat sullii seamma doaibmadási doalahit go dál, muhto unnán ovdánahttinvejolašvuođaid, lohká Ávvira váldodoaimmaheaddji, Kari Lisbeth Hermansen.
– Ii atte olu eanet návccaid
Hermansen geassá ovdan barggu man sihke Ávvir ja Ságat aviissat leat bargan ovdánahttin dihte fáláldagaset, muhto ahte dat juolludeapmi ii atte olus ođđa vejolašvuođaid.
– Goappešat sámi aviissat, sihke Ságat ja Ávvir, leat bidjan návccaid vuoruhit ja ovdánahttit aviissaid digitála fálaldagaid. Dat leat divrras barggut, earenoamážit go galgá sámegiela oažžut doaibmat digitála fálaldagain. Dát smávva lassáneapmi ii atte gal juste goappá ge aviisii nu olu eanet návccaid buoridit ja ovdánahttit min digitála fálaldagaid, lohká Hermansen.