Veahkehit nuppiid álgoálbmotmánáid
Mannan vahkus doalai Álttá siidda mánáidgárdi nu gohčoduvvon solidaritehtakafea, mas sisaboahtu manná veahkehit eará álgoálbmotmánáid.
– Juohke čavčča čoaggá mánáidgárdi veahkkin ruđa Mama Sarai, ja dan leat sii jo dahkan logenáre jagi, dadjá Álttá siidda pedagogalaš jođiheaddji Marie Louise Haetta Lantto.
Eaktodáhtolašbargu váhnemiid bealis
– Váhnemat gáhkkejit ja láibot láibbážiid, mánát fas juohkehaš ráhkada juoga nu mánáidgárddis ja vuvdet daid doppe. Sii čogget veahkkin ruđa Mama Sarai danin go son veahkeha eará álgoálbmotmánáid, ja sii háliidit veahkehit eará álgoálbmogiid, dadjá Lantto.
– Sidjiide lea maid dehálaš ahte ruhta manná dasa masa lea lohpiduvvon, namalassii skuvlahuksemii Tanzanias, ja dan sii leat ožžon duođaštuvvot ahte dahket, lasiha son.
Mánáid mielas somás bargu
Mánáid iežaset mielas lea dát hui somás bargu, ja boarráseamos mánát gal jo áddejit masa ja geasa sii čogget ruđa. Mánát leat oaidnán govaid dan skuvllas, mánáin ja guovllus, dadjá Lantto. Mánát besset maid vuolgit mielde báŋkui go dolvot ruđa maid leat čoaggán, ja kafeas besset boarráseamos mánát leat giehmánnin, čaimmiha Lantto.
Mama Sara giitevaš
Gunhild Berit Sara Buljo, Mama Sara, mielas lea hirbmat somá go álgoálbmogat ieža dorjot nuppiid álgoálbmogiid.
– Ja jus dat eai doarjjo, na gii de galgá doarjut? Nu mot masaiat lohket, dadjá Mama Sara.
Čoaggimin ruđa vai besset áiddi cegget
– Justa dál leat čoaggimin ruđa cegget áiddi skuvlla birra, vai oamit eai beasa borrat gilvagiid ja muoraid maid mánát leat gilván, loahpaha Mama Sara.
maritinger@avvir.no