Guovttis sivaheamit ja guovttis ges sivalaččat
Sis-finnmárkku diggegoddi cealkán duomuid loddenáššiin
Čakčamánu álggus ledje guokte loddendikki Sis-finnmárkku diggegottis. Guovttis eaba dubmehallan, muhto nuppi áššis dubmehallaba goappašagat.
Čakčamánu 15. beaivvi celkui duopmu áššis mas guokte dievddu leigga áššáskuhtton goabbatge áššis, muhto sudno diggi čađahuvvui oktanis go goappašagat leaba čuoččuhan ahte leigga oahpaheamen nuoraid, dasa lassin go sámi árbevierut ledje duođaštussan dikkis.
Ii goabbá ge dievdduin mieđihan iežas sivalažžan lobihis bivddus.
Áktor gáibidii duomu
Áktor áššis lei gáibidan ahte boarrásat dievdu dubmehallá máksit 15 000 ruvnno sáhku, dasa lassin go massá hávlára, láttaid ja čohkkánlottiid. Nuorat dievddu ektui lei gáibidan ahte dievdu dubmehallá 14 beaivái giddagassii, sáhkkohallá 15 000 ruvnnuin ja vel massá hávlára, láttaid, čohkkánlottiid ja ovtta gaskojuvvon lotti.
Albmáid advokáhtta ges gáibidii ahte goappašagat áššehuvvaba.
Eai sáhte biehtadit
Boarrásat almmái čilgii dikkis ahte son lei jávregáttis oahpaheamen iežas fuolkki loddet dan seammás go fierbmu, muhto ahte son ii lean loddeme. Son oaivvildii ahte go oahpaha, de lea dárbu bidjat čohkkánlottiid jávrái ja fievrredit bissu mielde vai beassá čájehit mo bivdu dáhpáhuvvá.
Dikki oktasaš árvvoštallan lea ahte ii sáhte biehtadit ahte almmái lei oahpaheamen iežas fuolkki loddet.
Árbevieruid dihte áššehuvvan
Nuorat dievddu ektui lea diggi juohkásan, muhto eanetlohku, namalassii mielduopmárat, oaivvildeigga ahte dievdu galgá áššehuvvat go jus son lei loddeme, de lei su bivdu lobálaš árbevieruid ektui, nu go vihtanat Sámedikkis, Guovdageainnu suohkanis ja Sámi bivdo- ja meahcástansearvvis čilgejedje.
Dikki eanetlohku oaivvilda ahte giđđalodden lea dehálaš árbevierru Guovdageainnus ja maid sámi kultuvrras. Bivdoárbevierru suddjejuvvo ILO-169, 8. artihkkala bokte. Eanetlohku oaivvilda maid ahte giđđalodden lea nu garrasit gáržžiduvvon ahte dat sáhttá nohkat.
Danne oaivvilda maid eanetlohku ahte almmái lea bivdán lobálaččat ja galgá áššehuvvat.
Duhtavaš advokáhtta
Dievdduid advokáhtta Trond Biti
ii leat vel ollen oaidnit duomu iige leat vel hupman iežas klieanttaguovttuin go Ávvir hupmá suinna. Son dattetge dadjá iežas duhtavažžan go albmát áššehuvaiga.
– In leat vel oaidnán duomu, muhto mun lean duđavaš go leaba áššehuvvan. Inge dieđe manne nuorat albmá ektui ii lean ovttaoaivilvuohta go in leat vuos lohkan duomu, dadjá Biti oanehaččat.