Dehálaš muittuhus ahte viessobuollimii fertejit buohkat ráhkkanit
Juohke jagi lágiduvvo čakčat buollinsuodjalusvahkku, álot 38. vahkku, mii lea dán vahkkus. Dál oainnat lea álgán dat áigi jagis go eanemus viessobuollimat dábálaččat dáhpáhuvvet. Danne Norsk Brannvernforening dahje sámegillii Norgga Buollingáhttensearvi, bidjet fokusa buollinsuodjalussii, ja muittuhit olbmuide buollinsihkarvuođa jurddašit sihke ruovttus ja bargosajis. Searvi neavvuge buohkaid hárjehallat movt ja maid guhte ge galgá bargat jus viessu buollá, go dakkár hárjehallamiiguin leat gádjon sihke olbmuid heakkaid ja biergasiid.
Danne oaidnit ge hui dehálažžan ahte buot viesuin olbmot ieža čađahit dakkár hárjehallamiid go dan ii dieđe goas buollá viessu. De goit lea buorebut ráhkkanan dakkár bártti ektui, go dávjá lea dan láhkai ahte juohke sekunda lea dehálaš jus vissui dievvá suovva buollima dihte. Olmmoš oainnat jođánit meanahuvvá ja šaddá dieđuheapmin jus juhká ollu suova. Viessobuollimis duššet ge eanemus olbmot, ja juste danne oaivvilda Norsk Brannvernforening dehálažžan ahte olbmot čađahit buollinhárjehallamiid ruovttus.
Danne oaidnit ge hui dehálažžan ahte buot viesuin olbmot ieža čađahit dakkár hárjehallamiid go dan ii dieđe goas buollá viessu.
Guovdageainnu buollinveaga hoavda, Nikken Turi, dadjá ge Ávviris, ahte olbmot fertejit duostat ja muitit hupmat buollinsihkarvuođa birra. Dieđus lea váttis dákkár issoras fáttá birra hupmat, muhto guorrasat ollásit Turi ávžžuhussii ahte dan ferte dahkat vaikke lea váttis. De han lea juohkehaš dálus buorebut ráhkkanan dasa jus dakkár bártái goasse gártá. Das geassá ge son erenoamážit ovdan mánáid, go mánát sáhttet hui iešguđet ládje reageret go buollá, ja son lohká ge dábálažžan ahte mánát čiehkádit buolli viesus. Dat lea juoga man birra dieđus fertet duostat hupmat vaikke lea ruojus smiehttat viessobuollima birra.
Dattetge lea okta ráva okta dain deháleamos rávvagiin, ahte buot viesuin lea buollinalárbma mii doaibmá. Danne lea ge maid dehálaš iskat doaibmá go buollinalárbma. Buot statistihkat čájehit ahte muhtumat aŋkke vásihit viessobuollima, ja soapmásat maid báhcet dasa ruovttu ja biergasiid haga. Issorasamus aŋkke lea smiehttat ahte viessobuollimiin dáidet maid olbmot duššat. Dát olbmot dárbbašit ge veahki ja ovddasmorraša earáin, ja lea min buohkaid ovddasvástádus atnit fuola sis geat dárbbašit veahki dakkár dilis.
Lea ge maid dáid áiggiid hui dehálaš iskat ahte buot dáhkádusat leat ortnegis. Dáhkádusfitnodagat leat maid dál divrudišgoahtán dáhkádusaid, dan sivas go viessobuollimat leat nu issorasat lassánan. Eará leat dat divrasit árvvut, maid ruđat eai sáhte buhtadit. Jus gártá dakkár dillái ahte viessu buollá, de ferte muitit ahte deháleamos lea gádjut iežas ja earáid heakka, ja ráhkkanit dasa jus dakkár bárti šaddá, nu go buollinveaga hoavda Nikken Turi rávve olbmuid.