– OAHPAHUSLÁGA RIEVDADEAPMI
soaitá dán áigodaga stuorámus ášši
Go Norgga oahpahusláhka rievdaduvvo, de galget maiddái sámi ohppiid vuoigatvuođat nannejuvvot. Dán vahkkus meannudišgoahtá Sámediggi ođđa láhkateakstaárvalusa. – Dát bargu lea áibbas dehálaš go oahpahusláhkalávdegottis váillui sámi ovddasteaddji, dadjá Sámedikki bajásšaddan-, fuolahus- ja oahppolávdegotti áššejođiheaddji Piera Heaika Muotka.
Dán vahkkus meannuda Sámedikki bajásšaddan-, fuolahus- ja oahppolávdegoddi ođđa oahpahusláhkaárvalusa.
– Dat lea oba dehálaš ášši ja soaitá dán áigodaga stuorámus ášši. Vaikke Sámedikkis ii leat fápmu rievdadit lága, de lea goit hui dehálaš ahte min árvalus manná ráđđehussii, lohká bajásšaddan-, fuolahus- ja oahppolávdegoddeláhttu Piera Heaika Muotka (NSR), geas lea ovddasvástádus jođihit dán ášši.
Maŋŋel go lávdegoddi lea čađahan rabas gulaskuddama ja gieđahallan Sámediggeráđi čielggademiid ja árvalusaid, de galgá dievasčoahkkin ges meannudit láhkaárvalusa.
Váilevaš sámi gelbbolašvuohta
Go ráđđehus bargagođii ođđa oahpahuslágain, de ásahii sierra oahpahusláhkalávdegotti 2017:s. Sámediggi lea cuiggodan eiseválddiid go lávdegottis ii lean sámi gelbbolašvuohta.
– Sámediggái šaddá dát bargu áibbas dehálažžan go oahpahusláhkalávdegottis váillui sámi ovddasteaddji, dadjá Muotka.
Sámediggi lea vuđolaččat čuvvon láhkalávdegotti barggu ja lea čađahan sierra gulaskuddama nannen dihte oahpahuslága sámi vuoigatvuođaid.
– Vaikke Sámedikkis leamaš gulaskuddan, de leat mearridan maiddái rabas gulaskuddamii bovdet maŋŋebárgga diibmu 15.00. Mii diehtit ahte olbmuin leat iešguđetge vásáhusat sámegieloahpahusa ektui ja dáid birra háliidit diehtit ovdal go meannudit láhkaárvalusa. Jáhkkimis lea oallugiidda álkit muitalit vásáhusaideaset birra njálmmálaččat go čálalaččat.
Olu bealit čielggaduvvojit
Sámediggeráđđi ávžžuha iešguđetge divodemiid ja rievdadusaid ođđa láhkaárvalusas. Daid lea hábmen Riikarevišuvnna sámi mánáid vuoigatvuođaiskkadeami, váibmogiellaraportta ja gulaskuddama vuođul.
Earret eará oaivvilda sámediggeráđđi ahte skuvlaeaiggádat galget gáiddusoahpahusa oahppiide addit fálaldaga čađahit oasi oahpahusas sámegielat birrasis. Láhkalávdegoddi ges lea árvalan ahte oahppit galget dán oažžut jus lea dárbu dása.
– Mun jáhkán ahte lea dehálaš lágaid ođasmahttit dađistaga go áigi han rievdá. Sámegiela dáfus lea gáiddusoahpahus lassánan ja dan ektui lea dehálaš heivehit lága, lohká bajásšaddan-, fuolahus- ja oahppolávdegotti láhttu Piera Heaika Muotka.
Eai sirrejuvvo sierra kapihttalii
Sámediggi lea árvalan láhkalávdegoddái ahte oahpahus sámegielas ja sámegillii integrerejuvvo láhkii, ii ge sirrejuvvo sierra kapihttalin nu go dálá oahpahuslágas dahkko. Dainna lágiin jáhkká Sámediggi ahte sámi vuoigatvuođat oahpahussii bohtet buorebut oidnosii sihke skuvlaeaiggádiidda, skuvlajođiheddjiide, ohppiide ja váhnemiidda.
Oahpahusláhkalávdegoddi lea čuovvolan Sámedikki evttohusa, ja dat lea Muotka mielas hui dehálaš.
– Dál lea nu ahte olu skuvlaeaiggádat eai ipmir ahte láhka guoská maiddái sidjiide vaikke eai gula sámegielaid hálddašanguvlui. Buot sámi ohppiin han lea riekti oahppat sámegiela vaikke gos dal oroš. Skuvlaeaiggát galgá sihke muitalit dan rievtti birra ja sii galget maid láhčit sámegieloahpahusa. Jus skuvlaeaiggát ii dieđe ahte láhka maiddái fátmmasta sin, de šaddet váhnemat ja oahppit dárbbašmeahttimut dáistalit sámegieloahpahusa ovddas, lohká son.
Sávvá stuora eanetlogu
Ođđa oahpahuslágaevttohusas leat olu eará čuoggát mat gusket sámi rivttiide. Go Muotka galgá eanet ovdamearkkaid geassit ovdan, de dadjá ahte ođđa lága bokte rahpasit ođđa vejolašvuođat.
– Lea stuora illusáhka ahte ođđa oahpahusláhka rahpá vejolašvuođa oažžut oahpahusa buot sámegielain. Ovdamearkka dihte galgá maiddái Norgga skuvllain vejolaš oažžut oahpahusa ubmija bihtánsámegillii vaikke dát leat masá jávkan dáppe. Dát sámegiella han eallá Ruoŧas ja dalle lea imaš ahte riikaráját leat hehtten oahpahusa daid sámegielain, čilge Muotka.
Son dadjá ahte bajásšaddan-, fuolahus- ja oahppolávdegoddi ii leat vel gieđahallagoahtán láhkaárvalusa, muhto ahte gárvejit barggu bearjadahkii.
– Mun doaivvun ahte Sámedikki dievasčoahkkimis lea stuora eanetlohku go meannudit ášši doppe, loahpaha son.