Bargoaddi DNDM vuostá dikkis
bidan ahte son oažžu máksojuvvot olles dan áigodaga ovddas, gitta 31.12.2020 rádjái, mii lea bargosoahpamušáigemeari loahppa, lohká advokáhtta Trond Skogly.
Duopmu celko njealji vahku geahčen.
Ášši lea bures čuvgejuvvon
Ášši vástideaddji advokáhtta Oddmund Enoksen lohká su mielas čilgejedje sii ja vihtanat ášši bures.
– Mu mielas lea ášši bures čuvgejuvvon ja ášši čađahuvvui bures, lohká advokáhtta Oddmund Enoksen.
Dikkis šattai maid sáhka leat go sápmelaččat nationála unnitlogu álbmot vai eamiálbmot.
– Eurohpáráđi nationála minoritehtaid konvenšuvnna čilgehusas leat sápmelaččat maiddái nationála minoritehta. Ruoŧas ii leat dat váttisvuohta. Dieđán Sámediggi, go Norga ratifiserii dan konvenšuvnna, ii háliidan leat nationanála minoritehtan. Muhto čilgehusa mielde lea sápmelaččat sihke nationála minoritehta ja eamiálbmot. Eai das leat vuostálasvuođat, čilge Enoksen.
Buorre boahtteáiggi dovdu
Ášši vástideaddji Davvi-norgga dáiddamusea stivrrajođiheaddji, Grete Ellingsen, lea duđavaš.
– Buot duođaštusat maid mii buvttiimet ja dan maid vihtanat vihtanušše, čájehit čielgasit manin mii stivrras háliideimmet ovddeš direktevrra luvvet eret bargosoahpamuša áigemearis, čilge stivrajođiheaddji Grete Ellingsen.
Son lohká su mielas lei maid buorre beassat njulget buot molssaevttolaš čilgehusaid.
– Mii beasaimet buohkat čilget ahte politihkalaš áššit, sámi áššit dahje riidu gaskal Bådådjo ja Tromssa, ii lean sivva oppanassiige. Háliidan maid deattuhit ahte mus eai leat negatiivvalaš guottut sámiid ektui, lohká DNDM stivrajođiheaddji Grete Ellingsen.
Son doaivu ahte sii dikki bokte leat nagodan čalmmustahttit man erenoamáš fiinna dáiddamusea DNDM lea. Dál váilu velá ođđa direktevrra virgádit.
Ožžon heajos beaggima
DNDM stivralahttu Joar Nango, gii geassádii stivralahttun go gulai ahte stivra lea lihccon direktevra Jérémie Mcgowan, muitalii dikkis ahte stivrajođiheaddji Grete Ellingsen ii liikon ahte Nango evttohii ahte DNDM njulggadusain galggašii čuožžut ahte sámi áirras galggašii leat stivrras, nu mo Davvi-norra dáiddamusea lea dan dahkan.
– Mu lea Kulturdepartemeanta nammadan stivrii, ja livččii sáhttán vaikko gean nammadit. Mu mielas vástidii Ellingsen hui unohasat go dan loktejin áššin stivrii. DNDM han galgá ovddastit olles Davvi-norgga ja maid Sámi. Mu mielas lea DNDM meannudan Jérémie Mcgowan nu badjelgeahččalaš vugiin go vejolaš go direktevra lea čájehan ahte DNDM maid lea áigeguovdil ja čuovvu riikkaidgaskasaš fáttáid, lohká Joar Nango.
Ovddeš DNDM stivralahttu Joar Nango ballá DNDM musea dainna dikkiin sáhttá leat gavdnjen vejolaš bargiid ja dáiddáriid guhkes áigái.
– In jáhke ovttage gillet bargat diekkár bargosajis. Lea suorggahahtti go DNDM stivrra eanetlohku galgá beassat mearridit mo DNDM galgá leat, lohká Joar Nango.