Jáhkkiba sudnos leu buorre ášši bargoaddi DNDM vuostá dikkis
Davvi-norgga dáiddamusea ovddeš direktevra Jérémie Mcgowan lei stevdnen bargoaddi go su lihcco eahpevuoiggalaččat 2020 njukčamánu 27. beaivvi. Medias leamaš maid sáhka lea go dan dihtii go son lea bealuštan sámi dáidagiid.
Ášši vuolggaheaddji, Davvi-norgga dáiddamusea (DNDM), ovddeš direktevra Jérémie Mcgowan, lei stevdnen ovddeš bargoaddi DNDM diggái. Ášši manai Davvi-romssa diggegottis. Jérémie Mcgowan čilge DNDM stivra ii lean čuvvon stivrenvuoigatvuođaid rájáid go su lihcco direktevrra virggis 27.03.2020.
DNDM stivrajođiheaddji Grete Ellingsen čuoččuha fas ahte direktevra Jérémie Mcgowan ii lean buktán stivrii 27. beaivvi daid raporttaid maid stivra lei bivdán guokte beaivvi ovdal. Váldogažaldat dikkis lei, celkkii go Jérémie Mcgowan eret iežas vuđolaš vuoigatvuođaid, dan nu gohčoduvvon «sikringsvern», dalle go čálii vuollái ođđa jahkásaš áigemeari 2020-2021 DNDM:IN mas celkkii eret virgesuodjalusa.
– In mun leat cealkán eret iežan vuđolaš vuoigatvuođaid go vuolláičállen áigemeari bargosoahpamuša nu go ášši vástideaddji NNKM čuoččuha. Advokáhtta Enoksen sivahalai mu mannan mediai, muhto mun in leat dan dahkan, ii ge sáhte dan duođaštit. DNDM stivrajođiheaddji Ellingsen čuoččuhii maid dikkis ahte mus ii leat gelbbolašvuohta jođiheamis ja ekonomiijas. Ii dat ge duođaštuvvon dán áššis. Duohtavuohta duođašta eará, lohká Jérémie Mcgowan.
Jérémie Mcgowan muitala ahte stivra ii addán go beannot beaivvi sutnje čorget kantuvrra ja gárvet báhpáriid maŋisboahtti jođiheaddjái, vaikko lei koronaáigi ja sus ledje smávvamánát ruovttus.
Čalmmustahttán sámi dáidaga museas
Jérémie Mcgowan lea ožžon hui olu rámi ja bálkkašumiid go lea čalmmustahttán sámi dáidagiid sihke DNDM museas ja riikkaidgaskasaččaid su vuosttaš bargosoahpamuša áigemeari áigodagas 2016-2020. Dikkis muitalii Jérémie Mcgowan ahte ođđa stivrajođiheaddji, Grete Ellingsen, gii válljejuvvui áigodahkii 2020-2023, ii liikon ahte Mcgowan lei ožžon sámediggeáirasa Muotka rahpat dáiddačájáhusa njukčamánu 12. beaivvi 2020:s.
– Dikkis čilgii stivrajođiheaddji Ellingsen seamma láhkai go munnje čilgii. Dan ahte soai advokáhtain Enokseniin geahččaleaigga dan šiitit, mii duođašta mu mielas Enoksena guottuid sámi ektui go čilge eamiálbmotdoahpaga, lohká Jérémie Mcgowan.
– Dohkketmeahttun áššemeannudeapmi
Jérémie Mcgowana, ášši vuolggaheaddji, advokáhtta lea Trond Skogly, ja lohká soai leaba nagodan duođaštit, maiddái dáhpáhusráiddu bokte, ahte DNDM stivra lea dán ášši meannudan dohkketmeahttun vugiin.
– Mii leat čujuhan ahte dat duohta dieđut maid sii leat buktán diggái, eai leat kvalitehtasihkkarastojuvvon. Eai ge leat iskan dollet go dat dieđut deaivása. Sii leat maid botken vuođđogáibádusa ahte sutnje geasa ášši čuohcá galgá maid beassat muitalit iežas oaivila, čilge Trondskogly.
– In mun dáhtton čielga buhtadussupmi, muhto mii leat gái