– Mii leimmet BUOHKAT beahtahallan
Lávvordaga nogai Eurovision niehku Keiinos, go Tix faskii Mgp-vuoittu ja galgá ovddastit Norgga Eurovision gilvvus mii lágiduvvo Rotterdamas miessemánus. Guokte beaivvi maŋŋel leat jurdagat maid ferte diktit vuodjut.
Mánnodatiđida lea Fred Buljo ruovttus Oslos jugadeame gáfe ja jurddašallame lávvordaga birra go Keiino šattai nubbin Melodi Grand Prix gilvvus.
– Boahtit nubbin Norggas lea buorre, lohká son ja jugista gáfe.
Čotta orru maid veháš geđđon dál, ja lohká iežas juoigan olu vahkkoloahpas.
– In heaitte juoigamis vaikko eat vuoitán, ja de easka gullo ge luohti, lohká Buljo ja boagusta.
Barge nu bures go sáhtte
Keiino lei Melodi Grand Prix finála oasseváldi, ja lei maid bajimusas oiddohiin Norgga ruhtaspeallanfitnodagain, muhto lei TIX gii vuittii Norgga finála.
Davvi-norga ja Vestlánda adde buot eanemus jienaid Keiinoi finálas, ja dan ovddas lea Buljo hirbmat giitevaš oaidnit nanu doarjaga álbmogis.
– Lean jurddašallan lávvordaga birra. Eat livčče sáhttán dahkat maidege buorebut, ja mii barggaimet nu bures go sáhtiimet. Jus livččiimet vuoitán ja beassan Eurovisionii, de jáhkkit ahte livččiimet birget buorebut dainna lávlagiin doppe go 2019:s. TIX ánssášii vuoitit ja Norgga álbmot mearridii ahte son lea buoremus ovddastit Norgga, lohká Buljo, gii sávvá ahte TIX vuoitá dan gilvvu.
Máŋgga ládje ráhkkanan
Sii leat geasi rájes bargan lávlagiin «Monument» mainna serve MGP gilvui, ja ledje hirbmosit ráhkkanan. Dattetge ferte ráhkkanit maiddái ahte ii soaitte mannat nu go jurddaša.
– Mis lei «plána A ja plána B». Dál boahtá mis ođđa musihkka fargga. Keiino ii noga ii ge Keiino leat dušše MGP, deattuha Buljo.
Sidjiide lei illudahtti go ledje stuora oiddohat ovdal finála.
– Dat lei somá, ja attii midjiide nanu iešdovddu finálii. Dat čájeha ahte olbmuin lei jáhkku ja leat liikon midjiide. MGP ii leat dušše musihkkagilvu, muhto geahččit válljejit dan artistta geasa liikojit buoremusat, ja TIX lei buorre, lohká son.
Gehččet ovddos guvlui ja dobbelii
Lávvordateahkeda páhkkejedje koaffariid maŋŋel finála, ja manne hotellii gos besse ieža humadit ráfis. Fred Buljo mieđiha ahte sii ledje beahtahallan go eai vuoitán.
– Mii leimmet buohkat beahtahallan. Dat lea áibbas dábálaš go lea nu olu ráhkkanan dása, muhto mii leat mearridan geahččat ovddos guvlui ja vuolgit čuojahit Eurohpái vel, lohká son.
Váillaha bivastathája ja vuoladiškuma
Sis leat olu plánat ja illudit fas beassat čuojahit konsearttaid go servvodat fas rahppo. Fred sávvá beassat Guovdageidnui boahtit beassážiidda Keiinoin.
– Ii leat beare olu mii časká Guovdageainnu beassážiid. Beassášlávdi lea stuora lávdi munnje ja lean giitevaš go lean máŋgii beassan leat mielde lávddis, lohká Buljo ja illuda váldit Keiino mielde Guovdageidnui.
Fred Buljo lohká vuohččan leamaš mielde beassášfestivála lávddis Buletjávrris go lei 16-jahkásaš ovttas mánnávuođaolbmáiguin Guovdageainnus. Son reašká go muitá ahte sin rumbomašiidna dajáskii go ledje lávddis, muhto dan rájes eai leat dakkár bárttit leamaš.
Dán jagi ii leat sihkar movt beassážat šaddet, ja šaddá go konsearta dahje mainna lágiin.
– Sávan ahte dat šaddá ja ahte buohkat beassat fas mannat konsertii. Mun maid váillahan olgobáikkis čuožžut bivastatolbmuid lahka, guoskat nubbai, ja maid ahte muhtin ribaha diškkihit vuollaga mu njeaiga, lohká Fred ja reaškkiha njálgát.