– Midjiide mearkkaša ollu jus Áltá vállje Romssa
Guovdageainnu Bargiidbellodat háliida suohkanstivrras digaštallat sihke buoret ja heajut beliid jus Guovdageaidnu šaddá Álttá čuovvulit Romssa fylkii.
Stuorradiggeválggat lahkonit ja dan oktavuođas lea šaddan sáhka, ahte juohkit fas Romssa ja Finnmárkku fylkkaid sierra fylkan. Álttá bealde leat dovddahan njunuš politihkkarat, ahte sii háliidit iežaset suohkana sirdit Romsii jus mearriduvvo sirret fas Norgga davimus fylkkaid sierra fylkan.
Guovdageainnu sátnejođiheaddji lea ifinnmark neahttaaviisii dadjan dan oktavuođas, ahte Guovdageainnu suohkanis lea lagasvuohta Álttá suohkanii.
– Midjiide lea lunddolaš geahččat Romssa guvlui ovdalii go nuppe guvlui. Mis leat ollu ássit geat johtet ealuiguin geasseorohagaide mat leat ovddeš Romssa fylkkas, ja oktavuođat leat dan guovllus ovdalii go nuorttas, dadjá Hans Isak Olsen (Guovdageainnu Dáloniid Listu).
Bargiidbellodat lokte áššin suohkanstivrii
Guovdageainnu Bargiidbellodat lea digaštallan dán ášši iežaset jahkečoahkkimis mii lei mannan sotnabeaivvi. Sin oainnu mielde sáhttá šaddat duohtan ahte Romsa ja Finnmárkku fas juhkkojit sierra fylkan maŋŋel stuorradiggeválggaid mat leat boahtte čavčča.
Guovdageainnu Bargiidbellodat maid geassá ovdan dan maid sátnejođiheaddji lea dahkan, ahte ollu suohkanássiin leat geasseorohagat ovddeš Romssa fylkkas. Dasa lassin lea suohkan geahččaleame beassat miellahttun regiovdnaovttasbargui Davvi-romssa suohkaniiguin maŋŋel go Oarje-finnmárkku regiovdnaráđđi ii fuollan sin mielde.
Mearkkaša ollu suohkanii
Guovdageainnu Bargiidbellodagas lea ge čielga oaidnu, ahte sin suohkanii mearkkaša ollu jus Áltá vállje Romssa fylkka. Erenoamážit go buohcceviesobálvalusaid leat buorideame Álttás, ja dat šaddá ge dehálaš lagas fálaldat guovdageaidnulaččaide. Dasa lassin fertejit maid árvvoštallat galgá go Guovdageainnus leat gullevašvuohta Romssa buohccevissui (UNN) vai Hámmerfeasta buohccivissui.
– Guovdageainnus lea historjjálaččat čielga finnmárkkuidentitehta, ja mii dovdat iežamet finnmárkulažžan. Dat mii maid nanne dan ahte mii galgat ain gullat Finnmárkui lea ovttasbargu finnmárkosuohkaniiguin, erenoamážit Kárášjogain. Mii háliidat lagas ovttasbarggu sámi suohkaniid gaskkas, ja dat šaddá váttisin jus sárgejuvvo fylkkarádji min gaskii, cealká Guovdageainnu Bargiidbellodaga jahkečoahkkin.
Suohkanstivrii
Guovdageainnu Bargiidbellodaga jahkečoahkkima mielas lea lunddolaš ahte dát ášši digaštallojuvvo dál juo suohkanstivrras dainna mihtuin, ahte álget árvvoštallat sihke buriid ja heajut beliid jus Romssa ja Finnmárkku fylkkat fas sirrejuvvojit ja Áltá vállje Romssa fylkka.