VÁILLAHA hivssega ja káfe bussemátkkis
Pensionista Jan Atle Samuelsen mátkkoštii bussiin Deanus Áltái čalbmedoaktára lusa, muhto dan guhkes mátkkis ii lean vejolašvuohta fitnat hivssegis, eai ge lean vuordinlanjat ja káffe maid ii lean fitnemis.
Jan Atle Samuelsen, gii ássá Buolbmágis, Deanu gielddas, lea dearvvašvuođa sivaid geažil šaddan johtit bussiin ja dan oktavuođas son lea fuobmán man hástaleaddji vuorraset olbmuide lea johtit bussiin. Samuelsen muitala ahte čuovui busse mielde Deanus Áltái go galggai čalbmedoaktára lusa, ja vásihii ahte ii lean várrejuvvon áigi beassat oastit borramuša dahje fitnat hivssegis.
– Dat lea máilmmi buorre go leat álggahan dakkár ruvtto, lea masá dego ekspreassaruvtto. Dat lea viehka guhkes mátki ja dasa dárbbašuvvojit fasilitehtat. Jus áiggut vuolgit Girkonjárggas Áltái de ádjánat ovcci diimmu, ja jus ii leat hivsset busses, dahje jus bisánanbáikkis ii leat hivsset, de šaddá dat váttisvuohtan. Dat daddjo ahte galgá leat hivsset daid guhkit bussemátkkiin, muhto dat ii leat nu. Mis lei dušše ovtta busses hivsset ja mii lonuheimmet busse moddii dien gaskka, lohká Jan Atle Samuelsen.
Boarrásat ballet
Jan Atle oaivvilda leat viehka guhkes gaskka Deanus Áltái gos ii beasa oastit borramuša dahje fitnat hivssegis. Dan oktavuođas lea ge Pensjonistforbundet Finnmark čállán lohkkiidreivve mas dáhttu fylkkaráđi geahčadit maid sii sáhttet dahkat vai buoridit bussedilálašvuođa pensionisttaide Finnmárkkus.
– Bileahtaid fidnet lea maid hástalussan, erenomážit midjiide geat eat máhte nu bures daid dihtordoaimmaid ja mo daid geavaha. Dávjá ballet boares olbmot vuolgit mátkái busse mielde, vaikke sis lea miella vuolgit mátkkoštit go dat lea hui fiinna vuohki mo mátkkošta. Go lea váttisvuohta fidnet bileahta, dalle šaddá váttisvuohtan beassat mátkkoštit, cealká Jan Atle.
Digitála fálaldat lea váttis
Son muitala go son áiggui tiŋgot saji bussii, de oaččui son vejolašvuođa máksit bileahta ovddas SMS dahje interneahta bokte.
– Dat manai bures go mus lei veahkki das lahkosis, go mus alddán lei stuorra váttisvuohta fidnet bileahta ja diehtit mo dat doaibmá. Go it don sáhte lotnut bileahta guokte diimmu ovdal go busse vuolgá, ja dat lea oalle váttis go buot lea digitálalaččat, deattuha son.
Dálkkiid siste
Samuelsen váillaha maiddái vuordinlanjaid, go galgá molsut busse dahje vuordit dassái busse boahtá.
– Go ledjen Álttás čálbmedoaktára luhtte, de fertejin vuolgit olggos hoteallas diibmu 12, ja busse ii vuolgán ovdal go dii. 16:00. Dat lea ortnegis jus dus leat oahppásat geaid sáhtát gallestaddat, muhto sis geain eai leat dat, sii fertejit dušše čuožžut dies olggobealde ja it sáhte beaivvi ge čohkkát kafeas ja vuordit dassái busse vuolgá. Snelandia berrešii láhčit vuordinlanjaid. Dieđán ahte ledje vuordinlanjat Álttás ja Kárášjogas, muhto dat ledje lohkkauvssa duohken ja dohko ii beassan sisa. Ferte baicce olgun čuožžut vaikke makkár dálkkiid siste, loahpaha pensionista Jan Atle Samuelsen.
Eahpesihkar mo lea šiehtadus
Romssa ja Finnmárkku fylkkaráđđi Kristina Hansen geas lea ovddasvástádus fylkkagieldda johtolagas ja fylkkagielda eaiggáduššá Snelandia, lohká ahte sii leat registreren lohkkiidreivve maid Pensjonistforbundet Finnmark lea čállán. Son muitala fylkkagielda lea álggahan barggu oažžut ođđa bussešiehtadusaid sadjái, muhto dat eai leat gárvásat ovdal go moatti jagi geahčen.
– Mun lean ovtta oaivilis ahte berrejit leat vuordinlanjat, muhto mun lean veaháš eahpesihkar makkár geatnegasvuohta mis lea dan ektui. Mis leat guokte stuorra guovddášsaji, Vuonnabađas ja Leaibevuonas. Mis lea nettokontrákta, muhtin oassi lea Boreala ovddasvástádus ja muhtin eará oasit leat min ovddasvástádus. Lean veaháš eahpesihkar makkár šiehtadus lea vuordinlanjaid ektui. Stuorra bussiin leat hivssegat, ja leat dat mat galget mannat daid guhkes gaskkaid, lohká Hansen.
Máilbmi eanet digitála
Son čilge áigi lea šaddan eanet digitála ja maiddái sii fertejit dan čuovvulit.
– Mii geahččalit dieđusge ahte mis leat dakkár molsunortnegat, go mii diehtit ahte eai buohkat leat nu hárjánan geavahit digitála vuogádagaid ja dat lea dávjá ahte boarrásat veaháš ádjánit oahppat dáid geavahit. Mis leat molsunortnegat ja dál lea maiddái korona, mii fertet ásahit sihkarvuođadoaibmabijuid min bargiide. Mii eat leat hálit reaidaruhtamávssu, go mii fertet váldit njoammueastadeami duođalaččat, loahpaha Romssa ja Finnmárkku fylkkaráđđi Kristina Hansen.