Sárdneolmmái ii beasa vuodjit siiddaid mielde
Sámemiššuvdna áiggošii siiddaid mielde jođašit skuteriigun vai besset sárdnidit dan mii čuožžu Biibbalis ja ságastallat singuin geat háliidit dahkat dan, muhto dasa ii leat suohkan addán lobi.
Sámemiššuvdna ja Radio DSF áiggoše vuodjit siiddaid mielde ja sárdnidit Ipmila sáni boahtte giđa, muhto Guovdageainnu suohkana dispalávdegoddi ii leat addán sierralobi vuodjit skuteriiguin siiddaide.
Eai vuollán
Radio DSF redaktevra Tormod Gusland lohká Ávvirii ahte sii ledje ohcan sierralobi Guovdageainnu suohkanis, muhto ohcan hilgojuvvui guovvamánu 16. beaivvi dispalávdegotti čoahkkimis.
– Mii ozaimet lobi vuodjit olles suohkanis, muhto livččiimet galgan ohcat lobi vuodjit dušše dihtoguovlluide, čilge Gusland ja čujuha ahte leat ovdal ohcan lobi vuodjit dihtoguovlluide.
Guovdageainnu suohkana dispalávdegoddi ii addán sierralobi ja lea čállán ákka ahte hilgot ohcama fuođđuid dihte. Gusland ii loga vuollánan go eai ožžon sierralobi, ja áigot sáddet ođđa ohcama suohkanii.
– Mii ipmirdit ahte ohcan lei hui obbalaš go leimmet ohcan olles suohkanis lobi vuodjit. Eat mii hálit billistit boazodoalu ja fuođđuid ovddas. Dat lea midjiide dehálaš, lohká son.
Ii leat vuos sihkar
Anders M. Sokki lea sárdneolmmái gii láve Ipmila sáni ovddidit guođohanbarttain.
– Ii leat nu somá go ii oaččo sierralobi, muhto dan ferte maid doahttalit, lohká hárjánan sárdneolmmái Ávvirii.
Son lea boazodoalli leamaš ja lohká iežas dovdat ja diehtit báikkiid, ii ge vuoje ealuid sisa.
– Mun manan Ipmila sániin dohko, ja lávejit váldit hirbmat bures vuostá, čilge son.
Diibmá lei su skuter billahuvvan, ii ge de joavdan dohko dan sivas. Dál ii leat sihkar sáhttá go beassat siiddaide go ii leat sierralohpi.
Báddejit sártniid
Gusland lohká ahte sis lea árbevierru mannat siiddaid mielde sárdneolbmáiguin. Ovddit háve go sis lei sierralohpi, lei 2019:s, muhto dalle eai ollen mátkái go muohta suttai árragiđa nu fáhkka.
Son čilge Ávvirii ahte eai sáhte čielga dáhtoniid mielde plánet goas vulget, go ferte maid oaidnit dálkki, siivvu ja johtimiid.
– Mii čuovvut njoammuneastadannjuolggadusaid ja lágidit sártniid olgoáimmus, ja mis leat tealttát mielde, lohká Radio DSF redaktevra.
Ohcamis čuožžu maid ahte lea plána 20 mátkki vuodjit gitta miessemánu 4. beaivvi rádjái, ja Radio DSF áigu báddet sártniid maid besset sáddet rádio bokte.
Ávvir lea geahččalan oažžut dispalávdegotti jođiheaddji Vegard Olsenii ságaide, muhto ii leat leamaš olámuttos telefuvnnas. Dispalávdegotti lahtut čujuhit jođiheaddjái addit kommentára áššis.