Felgen Orkester lávke Riddu Riđđu lávdái
eaiggádiid ala šaddá 2000 mehtera luodda, muhto maid gažada dan deháleamos gažaldaga, iežaset heakka.
– Mis lea nu olu hálbbit heagga ja birgejupmi dáppe, go eai oainne dehálažžan nu go jus heahteveahka lea jođus, ja vurdet ahte mii šaddat doallat dan rabas, ja mii dieđusge dahkat dan nu go mii nagodit, lohká Haetta.
Suohkanis leat eavttut
Guovdageainnu sátnejođiheaddji Hans Isak Olsen vástida ahte luodda, mii dán áššis lea namuhuvvon, ii leat áidna luodda mii muhtin jagiid áigi biddjui eret suohkanluoddan.
– Lea suohkanstivrra mearrádus leamaš muhtin jagiid ovdal. Manne nu geavvá lea dan dihte go suohkanis leat eavttut guđiid luottaid doalahit. Vuosttaš lea ahte doppe galggašii leat muhtin fitnodat, mánát geat galget skuvlii, nie ollu viesut. Mearrádus ahte suohkan ii doalat luottaid lea seastima dihte, lohká sátnejođiheaddji Hans Isak Olsen.
– Mearkkaša go dat ahte go báikkis eai leat fitnodagat dahje skuvlamánát, de eai leat báikki ássit vuoruhanveara?
– Dađi bahábut de lea nie. Vuollemeronis lea maid luodda mii lea seamma guhkki. Ávžžis maid mat leat seamma dilis. Dađi bahábut de šaddet dat olbmot doalahit luottaid.
– Dat lea stuora gollun sidjiide geat orrot dan báikkis, maid sii ieža fertejit gokčat. Lea go dat vuoiggalaš doaibma doallat olbmuide ássanmiela go háliidit orrut báikkis gos leat bajásšaddan?
– Vuosttažettiin, juohkehaš vállje gos háliida orrut, dat ii leat suohkana mearrádusas. Ja dađi bahábut go vállje earálágan čovdosiid, de sáhttá časkit dáinnalágiin go dát. In áiggo lohkat ahte fertejit dohkkehit dan, lea áibbas riekta ahte bidjet jearaldatmearkka diekkáriidda. Nu ahte de gártá politihkkariid duohkai galgat go dahkat maidege, galgat go váldit goluid badjelassii ja de šaddá eará sajis dieđusge čuohppat goluid.
Ii leat oaidnán reivviid
Sátnejođiheaddji Hans Isak Olsen ii loga oaidnán daid oallut reivviid maid ássit leat sádden.
– Mun in leat oaidnán suohkana vuorkkáin. Lea imaš go eai oaččo vástádusa, dat ii leat gal buorre.
– Lea go dá vuogas vuohki bágget suohkana ássiid fárret čoahkkebáikái go golut leat nu ollu doallat luotta ortnegis?
– Dat ii leat ulbmil, ii leat jurddašuvvon. Dá lei okta dain seastimiin mii lei dalle go mearrideimmet, ja leat oalle máŋga luotta. Dat mainna lágiin dahkat dan lea loktet fas meannudeapmái dan ášši. Politihkkarat fertejit de árvvoštallat ja geahččalit gávdnat go čovdosiid. Dat ii leat ášši mainna mun sáhtán akto bargat maidege, go lea suohkanstivrra duohken.
Olsen lohká iežaset áigut geahčadit makkár čovdosat sáhtáše leat sidjiide geat orrot olggobealde márkana, geain leat stuora luoddagolut.
– Mii galgat luoddaplánaid meannudit fas dál giđa mielde.
Dakko bokte lea vejolašvuohta geahččat. Muhto gávdnat go čovdosa, dan ii dieđe. De ferte árvvoštallat juohke luotta mii lea leamaš suohkanluodda. Mun ipmirdan ahte sii vuorjašuvvet, vástida Hans Isak Olsen.
Evrejoga šaldái bođii eará sajis ruhta
Suohkan lea vuoruhan 670 000 ruvnno luottaide, earret eará bidjat šalddi evrejoga rastá, ja olu eará luoddadoaimmaide mannan jagi. Sátnejođiheaddji čilge ahte lea eará ruhtadeapmi Evrejoga šaldái.
– Juste Evrejoga šalddi mielde leat hui ollu olbmot geat vánddardit. Dakko lea leamaš šaldi, ja lei šaddan nu ahte olbmot eai beasa rastá. Diet ruhta mii dasa leat vuoruhuvvon ii leat suohkana ruhta, muhto koronaruhta, ja das ledje de eavttut masa daid sáhttá atnit. Dainna ruđain de leat suohkanluottaid divodan. Sáhtán namuhit ovdamearkkaid nu mo luodda Čorrui ja luodda Boaronjárgii. Die leat luottat mat dulvvi geažil giđđat šaddet čáze vuollai. Ii leat suohkana ruhta, muitala Olsen.
– Lea go nu álki vulosklassifiseret luottaid ja hoigadit ovddasvástádusa báikki olbmuide?
– Juo, dan gal lea hui álki. Das ii leat mii geatnegahttá suohkana diekko. Muhto olmmošlaččat, politihkalaččat ja etihkalaččat ii leat gal álki, dat lea čielggas. Dat buktá olbmuide liigeváttisvuođaid ja liigegoluid. Suohkan lea boltunfoandda bokte goit juolludan ruđa go ohcet dan. Nie lea suohkan geahččalan buhtadit veahá.
Sátnejođiheaddji ii loga alddis mihkke dadjat dasa go ássit jurddašit ášši geahččalit dikkis, go leat sullasaš áššit eará sajiin Norggas gos leat ášši čoavdán dikkis.
– Jus nu geavvá, de ferte oaidnit makkár boađus boahtá. Mun sávan ahte ii olle nu guhkás ahte ferte loktet diggái ášši, vástida Guovdageainnu sátnejođiheaddji Hans Isak Olsen.