Siidadolliin eai leat nu ollu eará fálaldagat

Sámemiššuvdna ja Radio DSF áiggoše vuodjit siiddaid mielde ja sárdnidit Ipmila sáni boahtte giđa, muhto Guovdageainnu suohkana dispalávdegoddi ii leat addán sierralobi vuodjit skuteriiguin siiddaide. Radio DSF redaktevra Tormod Gusland lohká Ávvirii ahte sii ledje ohcan sierralobi Guovdageainnu suohkanis, muhto ohcan hilgojuvvui guovvamánu 16. beaivvi dispalávdegotti čoahkkimis. Guovdageainnu suohkana dispalávdegoddi ii addán sierralobi ja lea čállán ákka ahte hilgot ohcama fuođđuid dihte. Gusland ii loga vuollánan go eai ožžon sierralobi, ja áigot sáddet ođđa ohcama suohkanii. Anders M. Sokki lea sárdneolmmái gii láve Ipmila sáni ovddidit guođohanbarttain. Son lea boazodoalli leamaš ja lohká iežas dovdat ja diehtit báikkiid, ii ge vuoje ealuid sisa.

Lea dološ vierru ahte sámemiššuvnna sárdneolbmát vánddardit siiddaid mielde, ja dollet maiddái lohkamiid muhtun dáluin. Sin doaibma dieđus lei hui dehálaš dan áigge go teknologiija ii lean doppe gos dál lea, muhto dál leat eanaš guođohanbarttain sihke TV ja rádio ja maiddái interneahtta. Liikká lea dan láhkai ahte siidadolliin, geat dávjá vahkkoviissaid leat guođohanbarttain, ii leat eará fálaldat go dan maid TV:S ja interneahtas oaidná ja rádios gullá. Dieđus sáhttá ealu birra vuojedettiin deaivvadit siidaránnjáin, muhto olus eará sosiáladeaivvadeamit eai leat. Vaikke dán áiggi leat buorit skuterat maiguin lea liidil mannat, de aŋkke šaddet siidadoallit vuolgit ja guođđit ealu jus galget eará olbmuiguin deaivvadit.

Duostat čuoččuhit ahte Anders M. Sokki sárdnemátkkit siiddaid mielde eai vaháguhte mot ge meahcceelliid, nu go Guovdageainnu suohkan čuoččuha. Son lea hárjánan meahccevánddardeaddji gii dovdá sihke boazodoalu ja meahci, ahte mot galgá vánddardit vai ii vaháguhte ja muosehuhte ovtta ge, ii elliid ii ge olbmuid. Ii ge son vuoje summal siiddaid mielde, muhto vuodjá daid máđijaid mielde maid boazosápmelaččat ieža geavahit. Danne eat nagot ge jáhkkit dasa ahte sámemiššuvnna sárdnemátkkit livčče vahágin geasa ge dahje masa ge.

Guovdageainnu suohkan berre ge árvvoštallat ohcama nuppi vuorus hui vuđolaččat ovdal go biehttalit sárdneolbmáid vuodjimis siiddaid mielde. Dat lea dološ vierru mii berre seailut nu guhká go dasa lea beroštupmi, sihke siidadolliin ja sárdneolbmáin. Livččii áibbas eará dilli jus boazosápmelaččat ieža vuosttaldivčče dan vuodjima, muhto min áddejumi mielde eai leat vuostehágut ealáhusas dan doibmii.

Duostat čuoččuhit ahte Anders M. Sokki sárdnemátkkit siiddaid mielde eai vaháguhte mot ge meahcceelliid nu go Guovdageainnu suohkan čuoččuha.