– Mii leat dieđihan dárbbu, muhto eat dieđe VUORUHIT GO
Stáda geaidnodoaimmahaga Davvi-norgga ossodat leat dieđihan dárbbu E45 sihkkarastit Guovdageainnu márkana čađa, muhto eai dieđe vuoruhuvvo go.
Moatti vahku áigi gopmánii guorbmebiila Guovdageainnu guovddážis juste báikkis gokko skuvlamánát rasttildit E45-luotta go leat skuvlii jođus dahje ruoktot maŋŋel skuvlla.
Dasa reagerejedje máŋggas, ja gáibidit dál doaimmaid sihkkarastit Guovdageainnu mánáid skuvlaluotta.
Norgga johtolatministaris Knut Arild Hareides ii gal leat ráđđi Guovdageainnu mánáide, ja bijai ovddasvástádusa Stáda geaidnodoaimmahahkii.
Dieđihan dárbbu
Eai Stáda geaidnodoaimmahagas ge leat makkárge lohpádusat Guovdageainnu mánáide.
Stáda geaidnodoaimmahaga Davvi-norgga plána- ja huksenossodaga jođiheaddji, Knut Åsmund Hågensen, muitala ahte sus ii leat vejolaš dadjat maidege dahkat, jus ii vuoruhuvvo ruhta dan divodeapmái.
– Mii leat dieđihan dárbbu E45 sihkkarastit Guovdageainnu čađa, goit juste daid váráleamos sajiid. De lea vuordit ja oaidnit vuoruhuvvo go dasa ruhta, muitala son.
Šaldi
Hågensen muitala ahte sii leat gearggus doaimmaid bidjat johtui jus ruhta boahtá.
– Dat mii livččii buoremus lea šaldi dahkat luotta bajil, dahje tunealla luotta vuoli, lohká son.
Stáda geaidnodoaimmahagas galgá ge dál boahtte jagi rájes viđa jagi plána sajis, mas visot vuoruhuvvon doaimmat galget huksejuvvot.
– Movt jus ii vuoruhuvvo E45 Guovdageainnu čađa dan plánas?
– Dalle šaddat dušše dakkár unnit doaimmaid bidjat johtui, nu go leahttomeari rievdadit ja eanet ja buoret čuovggaid juste daidda báikkiide gokko mánát rasttildit E45, lohká son.
250 guorbmebiilla beaivái
Ávvir čálii mannan vahkus ahte 5252 guorbmebiilla, mat geasehit guliid, vudjet Guovdageainnu čađa jahkásaččat.
Dál sáhttá Hågensen muitalit ahte leat birrasii 250 guorbmebiilla, unnit ja stuorábut, mat vudjet Guovdageainnu čađa beaivválaččat. Dat mielddisbuktá ahte jahkásaččat vudjet 91 250 guorbmebiilla Guovdageainnu čađa.
– 2250 biilla vudjet Guovdageainnu márkana čađa beaivválaččat. Das leat mielde Guovdageainnu ássit smávit biillaiguin, muohtaboltunbiillat, guorbmebiillat jođus lulás, ja nu ain. Dan logus leat gaskamearálaččat birrasii 11 proseantta unnit dahje stuorit guorbmebiillat. Nu birrasii 250 biilla, mat leat stuoribut go dábálaš biila, vudjet Guovdageainnu márkana čađa beaivválaččat, muitala son.