–Kvenagiel sálbmagirji nannešii kirkoeallima
Sis-finnmárkku proavás Egil Lønmo lea ilus go Davvi Hålogalándda bisma ja bismagodderáđđi almmuha kvena sálbmagirjji dán giđa mielde. – Kvena sálbmagirji nannešii kvenagielat sálbmalávluma ja kirkoeallima, lohká Lønmo.
Davvi Hålogalándda bisma ja bismagodderáđđi lea máŋggaid jagiid bargan dihtomielalaččat čalmmustahttit kveana kirkoeallima. – Kvena sálbmagirjji bargu lea jođus ja doaivumis sáhttit mii dan dán giđa mielde almmuhit, lohká Davvi-hålogalándda bismagoddedirektevra Oddgeir Stenersen preassadieđáhusas.
Sis-finnmárkku proavás Egil Lønmo muitala su proavasgottis guoská kvenagiel sálbmagirji erenoamážit Porsáŋggu, Deanu ja Unjárgga gildii. Son muitala ahte daid ođđasamos dárogiel sálbmagirjjiin leat birrasii 15 kvenagiel sálmma mielde.
– Dán kvenagiel sálbmagirjái bohtet birrasii 50 sálmma. Mis lei nu lihkku ahte Porsáŋggu gielddas ledje juo moadde kvenagiel sálmma gárvásat. Lei Terje Aronsen
gii daid lei heivehan buori gillii, lohká Sis-finnmárkku proavás Egil Lønmo.
Sis-finnmárkku proavasgottis leat Guovdageainnu, Kárášjoga, Porsáŋggu, Deanu ja Unjárgga gielddat. Norgga kirku čállá dat lea áidna proavasgoddi mas sápmelaččat leat eanetlogus. Danin lea proavasgottis sihke sámegiella ja dárogiella hálddahusgiellan. Proavasgotti hálddahus lea Kárášjogas.
Bargu moadde jagi jođus
Davvi-hålogalándda bismagoddi dieđiha dát bargu leamaš jođus jagi 2019 rájes čohkket Norgga beale kveana-suoma árbevirolaš sálmmaid maid olbmot leat lávlon. Kveana birrasis leat olbmot 2020 rájes jearragoahtán šaddá go mihkkige dan kveana sálbmagihppagis.
– Olbmot imaštit, almmuhuvvo go oppanassiige dát sálbmagirji mii lea gihppaga hámis. Kvena sálbmagirjji bargu lea jođus ja doaivumis sáhttit mii dan farga almmuhit, čilge Davvi-hålogalándda bismagoddedirektevra Oddgeir Stenersen.
Dušše juridihkalaš gažaldagaid čielggadit
Sálbmagirjebargu lea dál joavdan loahpahandássái nu mo Davvi-hålogalándda bismagodderáđđi mearridii geassemánu 2020:s. Davvi-hålogalándda bismagoddedirektevra Oddgeir Stenersen muitala dál leat sii velá čilgemin dárbbašlaš čielggademiid mat gusket juridihkalaš vuoigatvuođaide.
– Kveana sálbmagirjji galggašii leat gárvvis almmuhit 2021 giđa mielde, jus juridihkalaš čielggadeamit mannet nu mo galget, joatká Stenersen.