Čuoiganbeaivi
Lean oaidnán oallugiid muhtun unna gilážis geat leat issorasat čuoigagoahtán ja sii čuiget dál measta juohke beaivvi. Sihke stuorahat ja unnoraččat čuiget nu ahte …
Álggos doivon ahte olles gilli lea ráhkkaneamen cup-čuoigamiidda, muhto go dárkileappot guldalin maid sii hupmet, de gullen ahte ii leat nu.
Sin skuvllas áigot lágidit čuoiganbeaivvi. Buohkat skuvllas galget čuoigat ja gilvalit, sihke oahppit ja oahpaheaddjit. Rektor galgá maid čuoigat vaikko ieš lohká son ii biso sabehiid alde. Mánát gullojedje garrasit dadjame sutnje ahte dat ii leat mihkke ákkaid viggat eret čuoigamis.
– Jus dus eai leat sabehat, de dat iige leat ágga.
Daid oaččut mis luoikkahit, skuvllas leat vaikko man ollu sabehat maid ieš leat oastán deike, gullui muhtin vel lasiheame.
Ja dieđát go, váhnemat, áhkut ja ádját maid galget čuoigat.
– Dál gal šaddagođii gelddolažžan, ja leage leamaš guhká nu jaskat. Mun goit ferten geahččat dien gilvaleami. Lea somá oaidnit rektora bisohallame sabehiid alde, he-he …
Vaikko lean ollu vánddardan ja oaidnán ja vásihan feara maid, de in leat gullan dakkár gilvvu gostege eará sajis. Gilvvut leat ge juoga maid mun liikon geahččat.
Ferten vel muitalit gilvvuid birra:
Gilvvuide adnojit dieđusge vuoittut ja pokálat. Skuvla ii áiggo oastit gárvves pokálaid, ii medáljaid ge. Mánát galget ieža ráhkadit daid skuvllas. Sii galget muoras ávnnastit pokála ja de ivdnet dan čábbát. Medáljaid maid ávnnastit muoras ja láiggis bárgidit dehe ruvdejit bátti dasa. Jáhkán šaddat oba čáppa ja earenoamáš medálljan ja pokálan maid sii ieža ráhkadit. Mánát ja váhnemat galget vel dasa lassin ráhkadit gáhkuid, boljáid ja liegga juhkosa dan beaivái go čuoigangilvu lea.
Gal dien unna gilážis šaddá somá dien beaivvi. Lávejit go dan gilis gos don orut lágiduvvot diekkár gilvvut ? Vai seamma dat lea juste du dehe din gilis gos mun finadin dán vahkku?