Dálki ii galgga bissehit Beaivváža čájálmasa
Ruvaš ja buolaš Guovdageainnus ii bisset Beaivváš Sámi našunálateáhtera hárjehallamis olgun čájálmassii mas fargga lea álgočájálmas. Fargga leat gergosat čájehit teáhtera ođđa krimmabihtá.
8. ja 9. SIIDDUS
Beaivváš Sámi našunálateáhtera veahka lea máŋggaid mánuid hárjehallan bihttái «Guovžža vuoššat» mii lea ráhkaduvvon Mikael Niemi girjji «Koka björn» vuođul. Dál leat aiddobáliid sirdán hárjehallama olggos Guovdageainnu gilišilljui, ja fargga lea ge maid álgočájálmas Guovdageainnus, njukčamánu 5 beaivvi. Nu viidáseappot johtet sii Áltái, Buolbmágii, ja loahpahit gierdomátkki pálbmavahkkoloahpa Kárášjogas. Muđui áigot beassážiid fas čájehit čájálmasa Guovdageainnus.
Hárjánan dálkái
Beaivváža cavgileaddji Rawdna Carita Eira čuččoda bivvubiktasiiguin ruvašdálkkis Gilišiljus. Dálki ii galgga Eira mielas bissehit ovttage čađaheames bihtá.
– Mun jáhkán ahte mii leat hárjánan dálkái. Mii han orrut dálkki siste, mii leat hárjánan sihke gárvodit ja leahkit olgun. Stuorámus hástalusat leat várra teknihkalaš rusttegat buollašis ja diekkárat, muitala Rawdna Carita Eira.
Guovžža vuoššat – 1852 Kengis Gilážis
Teáhterbihttá govvida Kengis giláža, mii lea Davvi-ruoŧas, jagi 1852:s. Báhppa Lars Levi Laestadius vuoiŋŋalaš moriidus lea leavvan sámeálbmogis. Sámebárehuoš Jussi deaivvada báhpain, ja báhppa árpmiha su. Gilážis láhppo muhtin biigá, ja álbmogaš vuolgá bivdit guovžža man sii jáhkket bahádahkkin. Báhppa fas navdá ahte olmmošgoddi dat lea mátkkis. Jussi ja báhppa vuolgiba bahádahkki ohcat, ja dađistaga olleba lagabui vástádusaid.
Vuosttaš geardde profeššunealla bihtás
Neavttár Emil Karlsen lea Jussi bihtá váldoolmmoš. Dat lea vuosttaš profeššunealla teáhterbihttá mas son lea mielde, ovdal lea bargan smávit neaktinbargguiguin.
– In leat goassege ná stuora profeššunealla institušuvnnas ja stuora bihtás leamaš mielde. Mun illudan, lohká neavttár Emil Karlsen.
Emil Karlsen muitala ahte Jussi ja báhppa leaba olu lávdde nalde fárrolaga, ohcame vástádusaid, ja bohkosa ahte bihttá sáhttá veahá muittuhit muhtin eará muitalusa.
– Dat lea dego Sherlock Holmes ja su veahkki, dadjá Emil Karlsen mojunjálmmiid.
Krimmabihttá
Neavttár Nils Henrik Buljo lea báhppa Lars Levi Laestadius bihtás. Buljo muitala ahte bihttá galgá veahá issoras ja muitalus čuovvu dan guoktá geat dutkaba.
– Dat lea dakkár krimmabihttá, ja lea ge maid vuosttaš geardde go mun lean mielde dakkár krimmabihtás, lohká neavttár Nils Henrik Buljo.
Buljo hásttuha olbmuid boahtit geahččat, vaikko muhtin beivviid sáhttá buolaš galmmihit njunnegeaži.
– Mun jáhkán dan šaddat hui fiinnisin. Soaitá buolaš muhtin beivviid, muhto ii dan ábut, dál lea dálvi ja nu dat lea, bohkosa Nils Henrik Buljo, gii neaktá Lars Levi Laestadius rolla bihtás.