– Dárbbašat EALLI sámi giliid
Ealli sámi gilit sihke rittus ja siseatnamis lea okta geađgejulggiin sámi boahtteáigái, ja mii dárbbašat olbmuid Sámis, cealká NSR.
Norgga Sámiid Riikkasearvi (NSR) cealká preassadieđáhusas ahte sii leat vuorjašuvvan go oallugat fárrejit Sámi báikegottiin, nu mo SSB olmmošlohkostatistihkka mii almmuhuvvui maŋŋebárgga čájehii. Maŋemus Ssb-logut čájehit ahte Davvi-norggas njiedjá olmmošlohku. Vuosttaš geardde 100 jahkái riegádit unnit olbmot Davvi-norggas go dan maid jápmet. Diibmá unnui olmmošlohku 2000 olbmuin dan guovtti davimus fylkkas Norggas. Deatnu ja Unjárgga leat dat gielddat gos olmmošlohku lei eanemus njiedjan maŋimuš jagi.
Jorgalahttit sentraliserema
– Mii oaivvildit ahte lea vejolaš jorgalahttit sentraliserema ja sihkkarastit ássama olles Sámis. Muhto dat gáibida duohta politihkalaš doaibmabijuid ja doaimmalaš ja duostilis boaittobealpolitihka, dadjá NSR presideanttaevttohas Silje Karine Muotka preassadieđáhusas.
Fárrema Sámi guovlluide
Plána lea bures vuođuštuvvon sihke áššedovdiraporttaide ja guorahallamiidda, nu mo ráđđehusnammaduvvon boaittobeallávdegotti raporttaide ja Sámedikki cealkámuš davviguovlludieđáhussii, ja dán sáhttá olahit go máŋga iešguđet oasálačča ovttasbarget.
– Jus galgat sihkkarastit fárrema Sámi guovlluide de fertejit máŋga iešguđet oasálačča ovttasbargat. NSR dáhttu geatnegahttit Sámedikki jođihit dán ovttasbarggu. Sápmi ja Norga dárbbaša boaittobealpolitihka mii buktá ássanhálu ja eallinmovtta ja mii eastada sosiála erohusaid. Mii fertet doaimmahit politihka mii addá olbmuide vejolašvuođa hukset ruovttuideaset, bajásgeassit mánáideaset ja ollašuhttit nieguideaset ealli sámi báikegottiin miehtá Sámi, loahpaha Muotka.