Geatki gottii OLLES ČORRAGA
14 njiŋŋelasa leat Cohkolaga orohaga boazodoallit gávdnan maid geatki lea goddán.
Guovdageainnu oarjjabeale, Čáhppesváris, leat Cohkolaga orohaga boazodoallit gávdnan olles 14 njiŋŋelasa maid geatki lea goddán. Nils Ole Triumf reagere dasa ahte boazodoalli ieš ferte geasehit ráppiid gillái Stáhta luonddubearráigeahču (SNO) kantuvrii.
– Dat lea dieđusge váivi go ná geavvá, muhto ii dainna sáhte maidege bargat. Juohkehaš diehtá ahte meahcceealli dárbbaša borrat. Muhto lea heitot go boazoeaiggát ieš ferte geasehit ráppiid vulos gillái. Dat dagaha lassi barggu midjiide, dadjá Triumf.
Son lasiha ahte sin geasseorohagas, mii lea Romssa bealde, láve SNO boahtit várrái iskat ráppiid go dieđihit, ja imašta manne dan eai daga Guovdageainnus.
Soaittáhagas gávdnon
Nils Ole Triumf muitala ahte son ja siidaguoimmit ledje ealu čohkkeme, go áigot dáid beivviid ealu bidjat gárdái, ja dainna leat ferten vuordit go lea leamaš dálki. Čohkkedettiin soaittáhagas gávdne ráppiid.
– Dat lea dávjá ahte meahcceeallit leat aktiivvat dalle go lea dálki. Go leat borggat ja guolddut, de dat leat vánddardeame. Golbma ráppi mii gávnnaimet mehtera muohttaga vuolde. Doppe soitet ráppit maid eat goassege gávnna, muitala Triumf.
Boasttuáddejupmi
Finnmárkku SNO boraspireovddasvástideaddji, Magne Asheim, muitala ahte dán áššis lea leamaš boasttuáddejupmi, ja SNO láve vuolgit báikái go lea sáhka dákkár stuorra vahágiin.
– Dán áššis lea leamaš boasttuáddejupmi. Go lea sáhka dákkár stuorra ja fáhkkatlaš vahágiin, de galgá SNO vuolgit báikái. SNO láve guorrat geatkki luottaid ja maid iskat DNA. Mii galggaimet odne vuolgit dohko, muhto boazoeaiggádat ledje jo dolvon ráppiid gillái, ja mu ipmárdusa mielde eat sáhte dál šat vuolgit go boazoeaiggádat leat gárddastallame, muitala Asheim.
Dábálaččat galgá SNO vuolgit báikái
Asheim duođašta ahte dábálaččat galgá boazoeaiggát ieš fievrridit ráppiid sin kantuvrraide, jus eai leat varas ráppit maid SNO sáhttá báikkis dutkat ja viežžat.
– Lea duohta ahte ráppiid galget boazodoallit ieža geasehit min kantuvrraide, go dávjá leat ráppit mat fertejit liegganit ovdal go mii sáhttit dutkat daid, muitala Asheim.