Siiddas ovdánit barggut
Sámemusea ja Badje-sámi luondduguovddáža Siidda vuođđodivodanja viiddidanbarggut Anáris ovdánit plánaid mielde.
Bargguid vuosttaš muttu viiddanbarggut gárvvásmuvvet áigetávvala mielde miessemánus 2021 ja nuppi muttu musea- ja luondduguovddášdálu nuppástus- ja vuođđodivodanbarggut vulget johtui dan maŋŋá. Huksejeaddjin lea Senaatti-giddodagat ja Siida-dálu nuppástus- ja vuođđodivodanbargguid huksen- ja váldoagoartan lea válljejuvvon Sakela Rakennus Oy. Dan dieđiha Sámemusea ja Badje-sámi luondduguovddáš Siidda preassadieđáhusa.
Devdet dálá gáibádusaid
Siida-dállu rahppui 1998:s ja dál dat ođaduvvo vástidit dili, mas doaimmat leat viidon ja galledeaddjiid mearri lea lassánan. Fitnus Siidii bohtet teknihkalaččat ja doaimmaid geahččanguovllus dakkár musea- ja luondduguovddášsajit, mat devdet dálá gáibádusaid. Viiddidanosiid viidodat lea sullii 1400 m2, ja Siida viidu fidnus sullii beliin dálážis.
Guovtti oasis
Siidan vuođđodivodan- ja viiddidanbarggut dahkkojit guovtti muttus. Vuosttas muttus Sámemuseii huksejuvvojit viiddidanoasit, nappo čoakkáldatsajit ja restoráŋŋa. Dain sisbarggut leat gárvvásnuvvamin ja čoakkáldat ja restoráŋŋa šaddet gárvvisin miessemánus.
Nuppi muttus leat museadálu nuppástus- ja vuođđodivodanbarggut. Dalle ođasmahttet Siidda bargolanjaid ja dahket huksen-, liggen-, čáhce-, áibmorusttetbargguid ja elrávdnjeteknihkalaš divodan- ja ođasmahttinbargguid. Earenomážit sihkkarasto, ahte dálus lea siste buorre dilli, giddejuvvo fuopmášupmi čuovggaide ja akustihkka- ja dorvvolašvuođačovdosiidda ja maiddái dasa, ahte dállu lea energiijabeaktil.
Doaibmagoahtá riikaviidosaš vástumusean
Čoakkáldatovttadaga viiddideami maŋŋá Sámemusea bastá ođđa sajiiguin doaibmat riikaviidosaš vástumusean. Suoma álbmotmusea máhcaha Sámemuseai sámečoakkáldaga (badjelaš 2000 dávvira) 2021 čavčča. Dat máhcaheapmi lea riikkaidgaskasaš geahččanguovllus mearkkašahtti.
Olbmot besset galledit olgomusea
Miessemánus 2021 Siida lea gitta. Dalle museačoakkáldagat sirdojit dálá čoakkáldatrájuin ođđa čoakkáldatsajiide ja áššehasbálvalanbáiki fárre gaskaboddosaš sajiide. Geassemánu álggus Sámemusea ja Luondduguovddáš Siida ja restoráŋŋa bálvalit fas áššehasaid. Siidda áššehasbálvalanbáiki lea gaskaboddosaš sajiin Siida-dálu ovddabealde. Vuođđodivodanbargguid áigge olbmot besset galledit olgomusea. Restoráŋŋa bálvala ođđa lanjain ja sajiin. Siida ja dan ođđa lanjat ja sajit oktan vuođđočájáhusain rahppojit 1.4.2022.