Celkkii eret BARGGU
Davvinorgga Dáiddamusea (DNDM) hálddahuslaš jođiheaddji Bodil Kjelstrup celkkii eret barggustis dalá maŋŋá diggeášši Davvi-romssa diggegottis gaskal ovddeš direktevra ja DNDM.
Hálddahuslaš jođiheaddji Bodil Kjelstrup lea cealkán eret virggis Davvi-norgga Dáiddamuseas ja heaitá geassemánu vuosttaš beaivvi, dieđihii DNDM ruovttusiiddus duorastaga 25. beaivvi. Son lea bargan DNDM museas čieža jagi. Ekonomiija-, strategiija- ja plánabargu gullet hálddahuslaš jođiheaddji váldodoibmii.
– Mun celken eret daid dieđuid dihtii maid gullen diggeáššis Davvi-romssa diggegottis mannan vahkus. Mun vásihan ahte stivrras leat iešguđetlágan oaivilat mii guoská musea doibmii. Danin lei mu mielas riekta cealkit eret, lohká Bodil Kjelstrup.
Son muitala ahte su mielas leamaš hirbmat gelddolaš bargu DNDM:S go dat lea dehálaš báiki dáidda- ja kulturgaskkusteapmái. Preassadieđáhusas lohká ahte lea rámis go lea beassan leat mielde addimin erenoamáš vásáhusaid álbmogii.
Smiehttan ja vikkedaddan
Hálddahuslaš jođiheaddji Bodil Kjelstrup muitala Ávvirii ahte dan rájes go diggi loahpahuvvui guovvamánu 18. beaivvi, de lea son vuđolaččat smiehtan ja vihkkedallan buot dieđuid maid gulai dikkis.
– Mun celken eret barggus maŋŋebárgga, guovvamánu 23. beaivvi. In sáhttán eará dahkat. Mun čuvvon dárkilit mielde maid stivra dajai dikkis musea doaimma birra. Mun lean smiehttan ja árvvoštallan mo dat dieđut váikkuhit mu doibmii ja lean gávnnahan ahte lea buoremus cealkit eret. Dat lea mu persovnnalaš vuosttaldeapmi stivrra oaiviliidda maid gullen dikkis. Dat historjá mii bođii ovdan dikkis musea birra, dat ii leat nu mo mun lean vásihan musea doaimma, čilge hálddahuslaš jođiheaddji ja beaivválaš jođiheaddji Bodil Kjelstrup ja deattuha son ii hálit čilget justa mii dat lea.
Son muitala ahte sus leat golbma mánu eretcealkináigi. Muitala son lea láhčigoahtán barggu ođđa hálddahuslaš jođiheaddjái ja ođđa direktevrii go soai virgáduvvoba. Kjelstrup muitala son lea bargan DNDM čieža jagi ja sus lei beannot jagi virgelohpi ja lohká iežas hirbmat rámis dan barggu ovddas maid bargoveahka lea bargan museas daid jagiid.
– In mana beaivvát ala. Joatkkán buot álggahuvvon bargguiguin nu bures go vejolaš, lohká Bodil Kjelstrup.
Almmolaččat láitin
Buohkat, Ávvir maid, geat čuvvo mielde diggeášši Davvi-romssa diggegottis, mii lágiduvvui guovvamánu 15.-18. beivviid, besse gullat mo dilli lei DNDM stivrra mielas. Lei DNDM ovddeš direktevra Jeremie Mcgowan gii lei stevdnen bargoaddi DNDM diggái go ledje su lihccon barggus. DNDM stivrajođiheaddji ja buot vihtanat láite ja futno man hejot Jeremie Mcgowan lei doibmen museas barggu nu go ekonomiija, strategiija ja plána.
Lihkku viidásabbot eallimis
DNDM stivrajođiheaddji Grete Ellingsen lohká stivra lea váldán vuhtii Kjelstrup eretcealkima.
– Bodil Kjelstrup lea ieš cealkán eret virggis. Mii giitit su dan barggu ovddas maid son lea bargan musea ovddas ja sávvat lihku viidásabbot eallimis, lohká Ellingsen preassadieđáhusas.
Ávvirii lohká Grete Ellingsen ahte son ii dieđe maid Bodil Kjelstrup oaivvilda go čujuha DNDM doibmii ahte dat dat lea sivva eretcealkimii.
– Stivrra mielas lea váivi go Kjelstrup lea cealkán eret barggu, muhto mii atnit árvvus su ákkastallama manin son celkkii eret. Bodil Kjelstrup bođii fas bargui virgelobis golggotmánu 2020:s. Bodil Kjelstrup lea bargan hirbmat buori barggu museas ja olles stivra lea hirbmat duđavaš su bargguin. Ii leat makkárge riidu ja mis lea luohttámuš sutnje, lohká Ellingsen.
Stuorra vahát museii
Dáiddár Joar Nango muitala son lea ovttasbargan Bodil Kjelstrupain olu dáiddaprošeavttaid oktavuođain. Nango čilge su mielas gullá Bodil Kjelstrupa Davvi-norgga profešunealla čeahpimus ja návccalamos kulturbuvttadeaddjiid searvái.
– Museii leamaš son stuorra riggodahkan. Mu mielas lea hirbmat vahát go DNDM massá dakkár čeahpes olbmo dan dihtii go stivra ii máhte skihkalaččat hálddašit DNDM. Stivrra ovddasvástádus lea fuolahit ahte lea buorre bargobiras gos dáiddafágalaš čeahpes olbmot loktet, lohká dáiddár Joar Nango, gii maid lea arkiteakta. Son lei maid DNDM stivralahttu, muhto geassádii eret stivrras justa ovdal go stivra lihcui direktevrra Jeremie Mcgowana.