Mánáide galgá leat oadjebas skuvlageaidnu
Guovdageainnu čađa vudjet birrasii 250 guorbmebiilla, unnit ja stuorábut, beaivválaččat, ja jahkásaččat vudjet 91 250 guorbmebiilla márkana čađa. Erenoamáš hástaleaddji lea dat go guovdu ja gasku Guovdageainnu márkana lea guhkes luohkká gokko šaddet buot guorbmebiillat vuodjit. Das dušše sáhttá jurddašit makkár hástalus šaddá dálvesiivun alla, guhkes miehtálagas bissehit guorbmebiilla mii deaddá máŋgalogi tonna. Dakkár dilálašvuohta sáhttá čuožžilit go dakko lea luoddarasttildanbáiki olbmuide. Dakko dieđus maid beaivválaččat rasttildit luotta mánát geat leat jođus skuvlii dahje ruovttuide. Dat lea áibbas vissis ahte dát báiki Guovdageainnus ii leat oadjebas skuvlageaidnu mánáide geat šaddet dan váralaš luotta rasttildit beaivválaččat.
Mis lea unnán jáhkku ahte buot biilavuoddjit, ležžet dál jođus smávvabiillain dahje guorbmebiillain, álot leat nu gozuid alde go johtolatláhka gáibida. Dan han gullat measta beaivválaččat go leat leamaš johtolatdárkkisteamit, ahte álot leat leamaš jođus muhtumat geat eai doahttal leahttoráddjemiid. Seamma gullat go dárkkistit guorbmebiillaid, ahte muhtun guorbmebiillain leat nu roavva váilevašvuođat ahte eai beasa daiguin viidáseappot vuoddját. Danne dáidet maiddái Guovdageainnu čađa šuvihit guorbmebiillat main lea beare leahttu dahje eai leat dat buoremus deahkat. Dása ii leat ge eará vejolašvuohta go ásahit sihkkaris skuvlageainnu mánáide ja muđui eará vázzi olbmuide, go ii sáhte goasse luohttit biilavuddjiide 100 proseanta.
Dat lea beare álkes vástádus sihke stádaráđis ja geaidnodoaimmahaga hoavddas, ahte dušše duvddašit ovddasvástádusa nubbi nubbái.
Guovdageainnu suohkan lea ovdal váidalan dán luohká geaidnodoaimmahahkii ja doaimmahat lea lohpidan geahččat johtolatsihkarvuođa das. Muhto stáhta ii oro áigume dainna áššiin maide bargat. Johtolatministtar, Knut Arild Hareide, duvdila dán váttisvuođa Stáda geaidnodoaimmahahkii čoavdit. Stáda geaidnodoaimmahagas eai leat makkárge lohpádusat Guovdageainnu mánáide. Stáda geaidnodoaimmahaga Davvi-norgga plána- ja huksenossodaga jođiheaddji, Knut Åsmund Hågensen, dadjá dušše ahte buot lea ruđa duohken, ja jus dasa ii vuoruhuvvo ruhta, de eai daga maide.
Dat lea beare álkes vástádus sihke stádaráđis ja geaidnodoaimmahaga hoavddas, ahte dušše duvddašit ovddasvástádusa nubbi nubbái. Dasa dieđus ferte luoddaeaiggát, namalassii stáda, gávdnat čovdosa, beroškeahttá maid máksá. Buoremus čoavddus dieđus lea ráhkadit tunealla luotta vuolil gokko vázzit ja sihkkelastit besset nuppe beallái luotta.