HUIKKAS JA RIEDJA
go ožžo bivdoguovllu man háliidedje
Bearjadaga almmuhii Fefo geat ožžot bivdoguovlluid Finnmárkkus boahtte čavčča ealgabivddus. Ávvir čuovui njeallje ealgabivdi go Guovdageainnu Lagasradio almmuhii njuolggosáddagis geat ožžot bivdoguovllu Finnmárkkus.
Sii ožžo dan bivdoguovllu maid ledje háliidan, ja de gal šattai hui riedja ja huikkas. Muhto ovdal go almmuhuvvui, de ledje hui váccáhagas ja gealdagasas.
– Bággu bivdui beassat
Soahtofielbmálaš, Per Mathis Siris, lea bivdojoavkku jođiheaddji. Son lei ohcan bivddu ovttas iežas guvttiin oappáin ja ovttain olbmáin. Sii leat ovdal leamašan eanebut, muhto dál lea okta Siri vieljain ja vel oabbá eará bivdojoavkkuin ohcan bivddu.
Go Ávvir jearahalai su ovdal almmuheami, de sus eai gal lean guokte oaivila.
– Mun lean 30 jagi bivdán, nu mu gal lea bággu beassat muhtuma fárrui bivdui. Ii sáhte gal čakča mannat nu ii beasa bivdui, lohká son.
Mielde go earát bivdet
Nuppi oabbái ii leat gal vuos nu garrasit cieggan ealgabivdu go su boarráset villjii.
– Mu mielas lávii orrume hui somá go ain vulget bivdui. Danin mun maid háliidin mielde leat. Mu mielas lea hui somá bivddus leat. Diehttelasat lea mu boarráseamos oabbá mu ovdagovva. Mus lei maid miella su fárus leat bivddus, lohká Risten Siri.
Mettii
Sii ledje čoagganan máŋggas geahččat almmuheami man Guovdageainnu Lagasradio (GLR) sáddii neahtta-tv bokte. Gasku sáddaga ledje sii veahá skurdnjasat, go ledje almmuhuvvon visot bivdoguovllut maid dušše Guovdageainnu ássit besset ohcat, muhto sin bivdojoavkku jođiheaddji namma ii lean vel namuhuvvon sáddagis.
Muhtumat vel geažidedje ge ahte ammahal dál ii oba boađe ge bivduguovlu.
De fáhkka rievddai govva sáddagis, ja ihte TV gilgii dat bivdoguovllut maid eai lean vel almmuhan. De álge maid jođihit vulos dan gova nu de oidnojedje visot bivdoguovllut ja geat leat ožžon bivdoguovllu Guovdageainnus.
De gal šattai huikkas go fuomášedje ahte sii leat ožžon vuosttaš vuoruheami, Ádjiha. Muhto maid veahá bilidii go sii ledje háliidan ovdalii ahte namma almmuhuvvo dábálaš vugiin, ahte eai fuomáškeahttá almmut buot dieđuid das guđe bivdoguovllu guhtege lea ožžon dain mat eai lean vel almmuhuvvon.
Sii eai ollen jáddadit sáddaga ovdal go juo ledje oaidnán guđe bivdoguovllu sii ožžo. Juste dalle buollái hui riedja ja mokta, muhto eai lean nu duhtavaččat go nie besse diehtit gos sii galget bivdit.
Dat diehttelasat ii lean GLR gos medde.
Šálloša
Guovdageainnu ealgabivdiidsearvi dat lei man ovddas GLR sáddii neahtta-tv, ja nubbejođiheaddji ja sáttajođiheaddji Nils Ole Skum šálloša go nie geavai.
– Mun ipmirdan bures jus eai leat nu duhtavaččat go nie geavai. Lei vuosttaš geardde go mii leat neahtta-tv bokte bivdoguovlluid almmuheame, ja dađi bahábut manai veahá boastut. Áiggun šállošit Siri bivdojovkui go nie šadde beasset diehtit gos besset bivdit, ja earáide maid, go nie ii lean jurddahuvvon galgat min bealis ge. Mihttu lea goitge ahte mii dál leat oahppan gokko berret leat várrogasat, vai visot manná riekta nuppes, lohká Skum.
– Mu bargu maid ovttaládje billahuvai diekko bokte, go mun lean atnán áiggi ráhkadit dan movt almmuhit, ja maid álbmogis čiegadan listtuid. Liikká eat áiggo heaitit nu almmuheames bivdoguovlluid ja gii beassá gos ge bivdit. Mihttu lea boahtte jagi buorebut dahkat, lohká Skum.
Fefo ledje almmuhan 289 ealgabivdoguovllu ohcanládje, ja daidda ledje 438 bivdojoavkku ohcan beassat bivdit. Dat leat 21 bivdojoavkku eanet go diibmá. Geahča Ávvira neahttaaviissas gos guhte ge beassa bivdit boahtte čavčča.