Arnara ášši lea dehálaš buot mánáide geat gillájit skuvlašiljuin
Mannan duorastaga lei maŋemus beaivi Arnar Vuolab Jørgensena diggeáššis Nuorta- ja Sis-finnmárkku diggegottis. Son gáibida Kárášjoga gielddas badjelaš miljovnna ruvnno buhtadusa, vahágiid ovddas maid čuoččuha gillát go skuvla ii bissehan givssideami. Otná aviissas lohkat maid gieldda advokáhtta ja Arnara advokáhtta prosederiiga maŋemus beaivvi diggestobus. dieđus eat áiggo ovdagihtii maide einnostit dan ektui mii lea dan áššis lea rievttes duopmu, muhto mannan vahkku dikki olis aŋkke leat gullan ollu beliid mot Kárášjoga gielda barggai go Arnar šattai gillát skuvlašiljus.
Ii gávdno ge eahpádus ahte Arnar gillái go lei oahppin Kárášjoga skuvllas. Dat mii goit lea áibbas čielggas ahte gielddas, dahje rektoris ja oahpaheddjiin, ii leat goasse váldi mearridit mii lea givssideapmi, iige dan mearridit maid mánná berre gierdat skuvlašiljus. Leaš dal hearkkes dahje garralunddot mánná. Dat definerenfápmu lea dušše dan mánás gii gillá givssideami geažil. Lea duođaštuvvon bures ovddeš mediaáššiin ja dál dikkis, ahte Arnar lea gillán garrasit Kárášjoga skuvlašiljus. Dán áššis liikká lea dat gažaldat mii galgá čielggaduvvot, ahte barggai go Kárášjoga gielda doarvái lágaid ektui bissehan dihte givssideami.
Aŋkke ii sáhte čiehkat, ahte dien áiggis go Arnar gillái Kárášjoga skuvllas ja skuvlašiljus, de lei givssideapmi stuorra váttisvuohta Kárášjoga vuođđoskuvllas. 2009:s almmuhuvvui ovdamearkka dihte riikaviidosaš raporta mas almmuhedje makkár dilli Norgga vuođđoskuvllain lea. Dát lei dalle surgadis lohkamuš Kárášjoga olbmuide. Das bođii ovdan ahte Kárášjoga skuvllas lea ollu hárdin. Dan oktavuođas lei Kárášjoga vuođđoskuvla nummar 77 mobbemis Norgga guovtti duháha vuođđoskuvlla searvvis. Dalle gieldda njunnošat bealuštedje dan suorggahahtti dieđuid dan láhkai, ahte sin skuvla lea nu buorre fuobmát mobbemiid. Danne leat nu badjin dan heajos listtus. Dat dieđus muitala veahá makkár oaidnu gielddas dalle lei givssidanáššiide maiguin duođai rahče.
Sávvat goit dan diggeášši, mii mannan vahkkus loahpahuvvui, šaddá ávkin maiddái mánáide geat dál gillájit givssideami dihte. Dat goit lea čielgasit čuvgejuvvon, ahte skuvllain fertejit leat buorit čuovvulan plánat go muhtun mánná gillá givssideami. Go juohke mobben lea okta beare ollu maid eat sáhte mot ge viggat bealuštit ja dahkat duššin. Lea čielggas ahte mánát, geat givssiduvvojit, gillájit, ja sidjiide galget oadjebas skuvlabeaivvit. Danne lea ge bággu ahte buot skuvllain leat buorit plánat mot eastadit givssidemiid. Dákkár dikkiid eat háliidivčče vásihit boahtteáiggis diggestobuin. Das lea sáhka das makkár duođalaš váikkuhusat givssideamis sáhttet šaddat mánnái go rávisolbmo ahkái joavdá.
Aŋkke ii sáhte čiehkat, ahte dien áiggis go Arnar gillái Kárášjoga skuvllas ja skuvlašiljus, de lei givssideapmi stuorra váttisvuohta Kárášjoga vuođđoskuvllas.