SÁTNEVÁDJASAT šaddet filbman
Omasvuona giellaguovddáš dáhtu čalmmustahttit sátnevadjasiid ja dán ollašuhttet filmmaid bokte. – Munnje eai leat sátnevádjasat apmasat, muhto olu sámi nuorat eai soaitte oba gullan ge daid birra, lohká giellabargi Edith Båhl.
Koronagáržžidusaid dihte eai beasa Omasvuona giellaguovddážis bovdet olbmuid doaluide, ja danin leat hutkan man láhkai sáhttet olahit iežaset geavaheddjiide.
– Go eat beasa deaivvadit, de leat hutkan eará bargovugiid. Álggos ráhkadeimmet filmmaid guovllu báikenamaid birra ja dál ges háliidit fuomášuhttit sátnevádjasiid, lohká Omasvuona giellaguovddáža giellabargi Edith Båhl.
Son ja su bargoskihpárat leat dássážii ráhkadan golbma filmma mat čalmmustahttet ja čilgejit sámi sátnevádjasiid.
– Plána lea vel ráhkadit moadde filmma, ja áigumuššan livččii maid ráhkadit filmmažiid kvenaid sátnevádjasiid vuođul go mis han lea máŋggagielat giellaguovddáš.
Bajásšaddan sátnevádjasiiguin
Edith Båhl muitala ahte son lea mánnávuođa rájes gullan ja geavahan sámi sátnevádjasiid, ja ahte sutnje lea dehálaš fievrridit dán árbemáhtu viidáset.
– Mu váhnemat ja mu sámi birrasis leat geavahan olu sátnevádjasiid olles eallima. Danin leat sátnevádjasat oahppásat munnje, muhto olu sámi nuorat eai soaitte oba gullan ge sátnevádjasiid birra, lohká Båhl, gii sávvá ahte sihke nuorat buolva ja maiddái ollesolbmot atnet ávkki sátnevájas-filmmain.
– Jus nuorat juobe gulaše ge sátnevádjasiid birra dál, de soaitá sis badjánit eanet beroštupmi go rávásmuvvet. Dá lea nuorat bulvii dego vuolggasadji, lohká son.
Dehálaš kulturárbi
Omasvuona giellaguovddáža bargun lea seailluhit ja ovdánahttit sámegiela. Giellabargi Edith Båhl mielas lea dehálaš čalmmustahttit sámi sátnevádjasiid.
– Sátnevádjasat leat dehálaš oassi min kultuvrras. Vai buohkat galget ipmirdit sátnevádjasiid, de soaitit vel ráhkadit filmma mas muitalit eanet sátnevádjasiid birra. Mii jáhkkit ahte skuvllat sáhttet geavahit dáid filmmaid go oahpahallet sátnevadjasiid birra, lohká son.
Båhl muitala ahte son lea buot golmma filmma neavttár, ja ahte sii leat siskkáldasat giellaguovddážis buvttadan filmmažiid.
– Olbmuid mielas leamaš somá geahččat filmmaid. Iežan mielas ges lea imaš iežan oaidnit, in riekta liiko dasa, lohká son.
Movttiidahttet geavaheddjiid
Go Omasvuona giellaguovddáš čalmmustahttá sátnevádjasiid filmmaid bokte, de soitet eambbosat oahpahallat ja geavahišgoahtit sátnevadjasiid.
– Dávjá oaidnit girjjiid maidda leat čohkken sátnevádjasiid ja báikenamaid, muhto goas daid šaddat rahpat ja lohkat? Mii vásihit ahte eará bargovugiin olahit dobbelii. Go ráhkadeimmet báikenammafilmmaid, de badjánii eanet beroštupmi báikenamaiade, lohká giellabargi Edith Båhl ja muitala ahte muhtin gilážis leat jo čohkkágoahtán sámi báikenamaid.
– Stállovákkis leat bivdán veahki čállit báikenamaid ja sii áigot ohcat ruđaid galbbaide.