Gearggus čájehit musihkkavideo ja oanehisfilmma «Gákteboles»
– Lea somá ráhkadit musihkkavideo, muhto olu bargu, dadjá Egil Pedersen. Son lea aiddoládje ráhkadan suohtas ja earenoamáš musihkkavideo Donkeyboy nammasaš popjovkui. Geassemánus ges lea vuosttaščájálmas su oanehisfilmmas mii lea gávtti birra.
Sámi rešissevra lea ovdalaččas ráhkadan sihke dokumentárafilmma, oanehisfilmmaid ja musihkkavideoid. «Kentucky» lea dássážii su čihččenuppelogát musihkkavideo maid lea ráhkadan. Mannan vahkus lei Donkeyboy popjoavkkus vuosttaščájálmas.
– Lean nuppes juo ráhkadeame musihkkavideo sidjiide. Álggus sin karrieara rešisserejin musihkkavideo «Broke my eyes» lávlagii, mii lei 2006:s. Dasa lassin lean filbmen sis konsearttaid, maiguin lean ráhkadan musihkkavideoid muhtin smávva prošeavttaide, nu ahte mun dovddan oalle bures joavkku, dadjá Pedersen, guhte orru Jessheimas.
Country ja cowboy-dánsa
– Jus Donkeyboy joavku váldá oktavuođa, de oažžu diehtit ahte sis lea somás prošeakta jurdagis. Dábálaččat láve skearrofitnodat, guhte áigu ráhkadit musihkkavideo ovttas artisttain, váldit oktavuođa iešguđet rešissevrraiguin. Dasto galget rešissevrat buktit ovdan iežaset ideaid maid gaskka skearrofitnodat ovttas artisttain válljejit dan buoremusa. Dán vuoru gal válddii popjoavku oktavuođa muinna ja jerre ovttasbarggu. Warner lea sin skearrofitnodat, mii leage okta dain stuorámusain Norggas, nu ahte mis lei buorre bušeahtta. Dieđán unnán USA stáda Kentucky birra, muhto jurdda lei ráhkadit suohtas govahallama cowboyain ja countrymusihkas, ja sii geavahedje olu áiggi oahppat dánssa. Joavkku rumbbostallis lea guoibmi guhte bargá Drammena teáhteris, nu šattai hui lunddolaš doppe báddet. Rumbbostalli lea maid hui áŋgir hábmet lávddi. Lea hui somá ja álki bargat olbmuiguin geat ieža maid veahkehallet. Mii báddiimet video njukčamánus, muitala Pedersen.
Sii leat musihkkavideoi vel ráhkadan oanehis máinnusfilmma man namma lea «Donkeyboy – 12 years later», mii lea gávdnamis neahtas. Filmmas sii veahá bilkidit iežaset go mahká eai gierdan lihkostuvvama man olahedje Ambitions lávlagiin, ja nu šadde fas máhccat dábálaš bargoeallimii, muitala Pedersen.
Gávttiin Grimstadai
Musihkkavideo «Kentucky» lea dássažii ožžon buriid dávistemiid ja Pedersen lea duđavaš bohtosiin.
– Lea olu bargu ja dávjá maid unnán ruhta ráhkadit musihkkavideoid, ja mu stuorámus niehku livččii ráhkadit fikšuvdnafilmma ja buot dábáleamos filmma. Mihttu lea ráhkadit sámi filmma Finnmárkku nuoraide, dadjá Pedersen.
– Muđui lean aiddo gárven oanehisfilmma mii galgá čájehuvvot mánu geahčen. Filmma namma lea «Koftepolitiet», sámegillii «Gákteboles». Filmmas nektet Mikkel Gaup, Sverre Porsanger ja Ingor Ántte Áilu Gaup. Sii eai leat neaktán ovttas 1987 rájes, go ledje mielde «Ofelaš» filmmas. Filbma lea golmma sámi dievddu birra geat vulget oaivegávpogii. Ovttas lea bajdelasas gákti vai galggašii geasuhit rivguid. Nuppi mielas ii leat heivvolaš nu dahkat, ja goalmmát fas suhtastuvvá go ii nagot geasuhit nieiddaid. Lea sámi oanehisfilbma mii muitaluvvo leaikkain ja mii geažuha politihkkii velá. Filmma bokte cuiggodit veahá dan mo olbmot, sihke sápmelaččat ja majoritehtaálbmot, dihtomielalaččat ja dieđekeahttá meroštallet dan mo sápmelaš galggašii leat, dadjá Pedersen.
Son illuda dassái filbma galgá čájehuvvot Oanehisfilbmafestiválas, mii lea Grimstadas gaskamuttos geassemánu.