Leavdnjalaš ferte diggái go jođihii gálvvuid maid ii oba buktán ge
Leavnnja dievdu ferte diggái go lea vuovdán sihke Playstation 4, skuterskuovaid ja lávu moatti olbmui, muhto ii goassege buktán daid gálvvuid maid vuvddii.
Geassemánu 16. beaivvi álgá ášši Sis-finnmárkku diggegottis mas Leavnnja dievdu, gii lea badjelaš 30-jahkásaš, lea áŋgirit jođihan gálvvuid Finn.no neahttasiiddus gos sáhttá priváhta dávviriid vuovdit. Dáhpáhusat ledje mannan jagi, jagi 2020, miessemánus skábmamánnui.
Njeallje dávvira vuvddii
Miessemánu 19. beaivvi vuvddii Finn.no siiddu bokte Playstation 4 mas čuovvu sierra speallanboallu ja Vr-čalbmeláset mielde. Gávppašeaddji sáddii 2649 ruvnno dievddu kontui dan gálvvu ovddas.
Geassemánu 2. beaivvi jođihii ges Playstation 4 pro 1575 ruvnno ovddas eará olbmui gii sáddii su kontui ruđaid.
Golggotmánu 22. beaivvi oaččui son 1400 ruvnno iežas kontui go jođihii skuterskuovaid muhtin goalmmát gávppašeaddjái.
Skábmamánu 14. beaivvi jođihii lávvoommana njealját gávppašeaddjái man lei Facebookas bidjan vuovdit ja oaččui 2000 ruvnno gálvvu ovddas iežas kontui.
Buot dáhpáhusain lea dievdu jávohisvuođain čiegadan ahte ii sáhte buktit gálvvu dahje ahte ii leat áigume vuovdinšiehtadusa doalahit, čuožžu čilgejuvvon áššáskuhttinmearrádusas.
Bissehuvvui vuodjimis biillain vuodjinkoartta haga
Dievdu galgá maid leamaš Kárášjogas mannan čavčča, čakčamánus ja vuodján biillain vaikko ii leat lobálaš biilavuodjinkoarta. Dan ovddas gáibiduvvo áššáskuhttinmearrádusas cagganáiggi bidjat vuodjinkortii ja čujuhuvvo geaidnojohtolaga 24. paragráfii dan ektui.
Áššáskuhttinmearrádusas gáibiduvvo maid ahte dievdu máksá ruovttoluotta supmiid maid lea ožžon gávppašeddjiin gat eai leat ožžon gálvvuid dievddus.