– II LEAT DOHKALAŠ gohčodit nuppi «biro fuorrá»
Álttá poltiijaráđi mielas ii leat dohkalaš normaliseret fasttes seksuálalaš sániid russalávlagiid bokte.
Álttá suohkan dieđiha preassadieđáhusa bokte ahte daid maŋemus áiggiid lea ovtta russalávlaga teaksta gullon viidát. Dán lávlaga sisdoalus leat sánit maid Álttá politiijaráđđi ii dohkket.
Politiijaráđđi dieđiha ahte ii dohkálaš makkárge dilálašvuođas gohčodit nuppi «biro fuorrá», dahje lávlut «čippos, muđui mun huškkastan du». Sii vuorjašuvvet dakkár áššiiguin, ii dušše Álttás, muhto olles servvodagas.
– Mii leat daid maŋemus jagiid gullan russalávlagiid main lávlot hui dábálaččat veagalváldimiid, veahkaválddálašvuođaid, áitagiid ja mánáidillastemiid birra. Muhtimat čiehkadit «russalávlla-šáŋŋera» duohkai, ja dainna lágiin eai ane daid sániid várálažžan. Muhto dát lávlagat ráhkadit dynamihka, joavkobággema ja dahket duođalaš kriminalitehta dábálažžan, lohká politiijastašuvdnajođiheaddji Finnmárkku politiijaguovllus Øyvind Lorentzen.
Ráhkadan plána
Álttá politiijaráđđi mearridii geassemánus 2019:s ráhkadit fágaidgaskasaš plána ovttasdoaibmamii, vai šattašii álkit hehttet ja gieđahallat fasttes seksuálalaš daguid mánáid ja nuoraid gaskkas.
Dán plána bargu álggahuvvui dan dihte go Álttás ledje ollu fasttes seksuálalaš doaimmat registrerejuvvon mánáid ja nuoraid gaskkas.
– Plána gárvánii njukčamánus 2021:s, ja ulbmil lea veahkehit sin geat barget mánáiguin ja nuoraiguin, váhnemiid ja maiddái nuoraid, bargoneavvuin mas oahppá gieđahallat ja hehttet dákkár problematihkaid, lohká Álttá suohkana sátnejođiheaddji Monica Nielsen preassadieđáhusas.
Sii dieđihit maid ahte dát váttisvuođat eai guoska dušše Áltái, muhto leat registrerejuvvon olles Norggas.