– MII EAT ballan leat doppe
Olbmot eai orron ballame vaikko Riddu Riđus lei mannan vahkkus duođaštuvvon korona.
Guoktásis Riddu Riđu bargiin lea duođaštuvvon korona,.
Guoktásis duođaštuvvui mannan lávvordaga covid-19 Riddu Riđus. Covid-19 fuomášuvvui dan beaivválaš iskkadeamis mii čađahuvvui juohke beaivvi Riddu Riđu gussiin ja bargiin.
Gáivuona suohkandoavttir ráđđádalai Álbmotdearvvašvuođainstituhtain ja ovttasráđiid leat árvvoštalle ahte ii leat stuora njoammuvárra Riddu Riđus. Danne eai heaittihan festivála.
– Mii čuovvut rávvagiid
Kamilla Tranås Kristiansen ja Patrick Schulstad ja sudno mánná ledje Riddu Riđu festiválias.
– Rievttimielde eat bala, lohká Patrick.
Kamilla jáhkká mannat bures jus buohkat ovttasbarget eastadit njoammuma.
– Ii šatta heajut festivála dovdu ja vásáhus dan dihte, lohká Kamilla.
– Mii leat hárjánan koronai
Riddu Riđus ledje ge olbmot coggan njálbmesujiid man festivála lea juohkán gussiide. Festivála ávžžuhii mehtera gaskka doallat ja ávžžuha olbmuid dávjá bassat gieđaid ja geavahit antibac.
– Mun in bala. Jus mii leat várrogasat ja doalahit gaskka olbmuide, de gal manná hui bures, lohká Aina Høgseth Haetta gii luohttá ollásit Riddu Riđu árvvoštallamiidda.
– Mii han leat hárjánan doalahit gaskka ja Tromssas gos mun orun leamaš olu korona. Mii diehtit dál movt galgá várrogasat vánddardit, lohká Høgseth Haetta.
Olbmot luhttet Riddu Riđu árvvoštallamiidda
Unni Fjellheim lea boahtán Mátta-sámis Riddu Riđu galledit. Dá lea su vuosttaš háve. Ii son ge lohkan iežas ballat.
– Ii lean vuordemeahttun ahte korona dáppe njoammugoahtá, go festiválas han leat olu olbmot. Dattege dovddan ahte lei veara vuolgit deike. Mii fertet dál čuovvut daid njoammueastadannjuolggadusaid ja dan bokte čájehit respeavtta Gáivuona birrasii. Luohtán ollásit Riddu Riđu árvvoštallamiidda joatkit festivála. Sii leat oba čehpet dán gieđahallan, lohká Fjellheim gii ii leat boahkuhuvvon.
– Lean juohke beaivvi iskkahuvvon ja mu iskkadeamit leamaš negatiivva, lohká Fjellheim.
– Ii billis festiváladovddu
Gáhpevuonas lei Biret Rávnná Aina boahtán. Son iige leat boahkuhuvvon vuos. Son lea vuorddašeame boahkuhuvvot.
– Mas mii galgat ballat? Jus bastá njoammun, de han mii šaddat immuna, lohká Solbakk gii dáhttu návddašit festivála ollásit.
ISÁK joavkkus lei okta miellahtuin leamaš seamma girdis go muhtin olbmos lea duođaštuvvon korona. Dát konsearta ii šatta.