Riddu Riđus koronadoaimmat: Olbmot vurde gitta golbma diimmu iskkahuvvot
Golbma diimmu vurde olbmot gierdevaččat beassat iskkahuvvot leago sis korona dávda vai ii.
BOAHTÁN GITTA OSLOS: Marita Natlalia Olsen, Halvar Riid Braaten, Carl Oskar Eriksen ja Marita Charlotte Dahl leat boahtán gitta Oslos vásihit Riddu Riđu. Nugo olu earát de šadde vuordit golbma diimmu iskkahuvvot leago sis korona.
Marita Natlalia Olsen, Halvar Riid Braaten, Carl Oskar Eriksen ja Marita Charlotte Dahl leat boahtán gitta Oslos vásihit Riddu Riđu. Nugo olu earát de šadde vuordit guhká iskkahuvvot leago sis korona.
– Mii leat čužžon masá golbma diimmu. Álggus orui hui ortnegis vuorddašit beassat váldit korona-iskosa, muhto dál gal leat dolkan. Mii leat čađa njuoskan, lohket sii.
Šnjoarri arvi
Duorastaga maŋŋelgaskabeaivvi válde máŋga čuođi iskosa Riddu Riđus. Bargguin ádjánedje ja olbmot bohte ja bohte. Dattege oaivvildedje olbmot geat vuorddašedje ahte lea dehálaš iskkahuvvot.
– Mii gal illudat festiválii vásihit sámi kultuvrra ja mii áinnas gal vuordit iskkahuvvot. Lea dehálaš ahte Riddu Riđđu dáhttu buohkaid iskkahit, go de dovdo oadjebas dáppe.
Maiddái Karoline Trollvik ja Anne Henriette Nilut ge leaba čuččodan diimmu ráiddus go Ávvir ságasta sudnuin. Sudnos lea unnimus diibmu vel čuožžut. Sudno mielasge lea dehálaš iskkahuvvot vaikko ádjána.
– Dovdo oadjebas ja livččii roassu jus deike njommošii korona. Dat leavašii oalle jođánit, lohkaba soai. ŠNOARRI ARVI: Gaskkohagaid lei šnjoarri arvi go olbmot galge korona iskkahuvvot.
Reaškkihedje obmuid
Duorastat álggahuvvui festivála Reaškkaš sámi stand-upain. Trine Lise Olsen lea bovden máŋga sápmelačča stand-upain guoimmuhit olbmuid. Ánte Siri lei okta sis gii guoimmuhii Riddu Riđus. Son earret eará muittašii movt olbmot maŋŋel golbma jagi Riddu Riđus fuomášedje ahte festiválas leat konsearttatge. Olbmot reške jur jámas go buohkat geat dovdet Riddu Riđu, dihtet máŋggas eai oba geargga ge campas lávdde lusa. Máŋgasiidda lea campa dat somámus vásáhus. Ánte Siri maid spivkii skávlliid birra mat Tromssas leat seamma vašuhuvvon go sápmelaččatge leat.
– Lei hui somá, muhto hui issoras go lei sámi publikumma, muhto manai nu bures ja dáppe lei nu reaškkas, logai Ánte Siri njuolgga maŋŋel go gearggai iežas osiin.
Masá visot bileahtat vuvdon
Dán jagi ávvuda Riddu Riđđu 30 jagi. Dušše 500 bileahta vuvdet beaivválaččat. Lávvardaga bileahtat leat vuvdon. Festivála jođiheaddji Sandra Marja West muitala moadde bileahta vel leat otná eahkedii ja bearjadahkii. Dán jagi festivála lea leamaš váttis plánet koronagáržžidemiid dihte.
– Dál lea hui buorre dovdu, vaikko leamaš hástaleaddji plánet koronagáržžidusaid ektui. Mii diehtit olbmot leat guhká čužžon vuordit iskkahuvvot. Ferten giitit go olbmot leat nu gierdevaččat leamaš ja velá arvvis vuorddašan. Mii
REAŠKKAS: Dát joavku guoimmuhii duorastaga. Stand Up komihkkár Trine Lise Olsen lea lágidan workshop ja riegádahttán njeallje ođđa standup komihkkára. lihkká oaidnit ahte olbmot leat buorre mielas. Jáhkán olbmot leat váillahan gávnnadit earáiguin ja návddašit festivála. Viimmat leat fas Riddu guolbanis olbmot ja dál lea Reaškkaš standup- šovvas leamaš máilmmi vuosttasčájálmas ja dál lea almmolaš rahpan, illuda festivála jođiheaddji, lohká Sandra Marie West
Riddu Riđus gáibiduvvo iskkaheapmi oktii jándoris ovdalgo beasat festivála-báikái. Jus leat ollislaččat geargan boahkuhemiin, de it dárbbaš iskkahuvvon. Jus vuosttaš dosa leat ožžon unnimusat golbma vahku áigi, de itge dárbbaš iskkahuvvot.