Dál beasat fas vázzigoahtit Bearalmátkkiid
Finnmárkku deháleamos olgoeallin- ja álbmotdearvvašvuođaaktivitehta álggahuvvo dáid beivviid.
Bearalmátkkit šadde stuora sukseassan diibmá go dalle lassánedje sihke oasseváldit ja čađahuvvon vázzinmátkkit. Dál lea Finnmárkku olggustallanráđđi gearggus ovttas gielddaiguin ja eaktodáhtolaččaiguin álggahit dán jagi Bearalmátkkiid.
2021 šattai olahusjahkin, 7969 oasseváldi čađahedje 164 416 mátkki ja dat čájeha ahte Bearalmátkkit leat ovdáneamin ja šaddamin Finnmárkku deháleamos olgoeallin- ja álbmotdearvvašvuođaaktitehtan. Dán jagi láhčet Bearalmátkkiid buot Finnmárkku gielddain.
– Buot 18 gielddas leat Bearalmátkkit ja dat lea hirbmat dehálaš go dat doaibma čohkke Finnmárkku. Mis eai leamaš goassege ovdal nu iešguđetlágan mátkki go dán jagi. Muhtin mátkkit leat orrunbáikkiid lahkosis ja eará gáibideaddji mátkkit ges leat doaresbealde. Lea hirbmat buorre ahte Bearalmátkkit leat máŋggabealálaččat, lohká Finnmárkku olggustallanráđi beaivválaš jođiheaddji Hugo Tingvoll preassadieđáhusas.
Oahpásmuva lagas birrasii
Bearalmátkkit hástalit olbmuid lihkadit ja vánddardit luonddus.
– Bearalmátkkit addet maid vejolašvuođa oahpásmuvvat buorebut iežas lagasbirrasii sihke ruovttugielddas, ránnjágielddas ja eará Finnmárkku gielddain. Mii vásihit ahte olbmuide lea álkit vuolgit mátkái ođđa guovlluide go čađahit Bearalmátkkiid, ja min sávaldat lea ge ahte finnmárkolaččat galget šaddet sávrribun ja čeavlábun, lohká Tingvoll.
Dán jagi suttihii muohta oalle árrat, muhto oanehis botta maŋŋel borggai fas. Dat šattai álggos hástalussan Bearalmátkkiid lágideddjiide, muhto sii dieđihit ahte máŋgga gielddas álggahit vázzinmátkkiid missemánu 17. beaivvi nu go ledje plánen.
– Go ii dattege šaddan árra giđđa ja go olu guovlluin ain lea muohta, de eat beasa álggahit nu olu mátkkiid go áigguimet daid beivviid. Eanaš mátkkit álggahuvvojit geassemánu 1. beaivvi rájes. Perletur.no neahttasiiddus sáhttá geahččat goas guhte ge mátki álggahuvvo. Dan neahttasiiddus besset olbmot maiddái dieđihit guđemuš mátkkiid leat čađahan, loahpaha Tingvoll.