Dál eai galggašii šat giddet Máze «boarrásiidruovttu»
Guovdageainnu suohkanstivra lea mearridan rahpat Máze ássan- ja bálvalusguovddáža gaskaboddosaččat, mii lea 2015 rájes dollojuvvon gitta suohkana gáržžes ekonomiija dihte. Suohkanstivra dagai hoahppomearrádusa rahpat ássan- ja bálvalusguovddáža, ja vižžet ruđa Disposišuvdnafoanddas. Dearvvašvuođa- ja fuolahusovttadaga jođiheaddji Kent Ailo Haetta čilgii suohkanstivrii ahte sii leat guhká bártidan gávdnat saji olbmuide geain lea riekti dakkár sajiide. Dál leat dan dilis ahte geavaheaddji lohku lassána vahkkus vahkkui, ja suohkan ii nagot fállat dohkálaš dearvvašvuođabálvalusa. Kent Ailo Haetta muitalii maid ahte dál leat 7-9 olbmo geain lea riekti oažžut dakkár saji. Danne mearridii suohkanstivra gaskaboddosaččat rahpat guovddáža, muhto čoahkkimis ledje suohkanstivraáirasat geat oidnet dárbbu bissovažžan doallat guovddáža doaimmas.
Guovdageaidnu berre duođaš árvvoštallat doalahit guovddáža rabas bissovažžan, ii ge dušše dan botta go lea vearrámus heahti. Unnán jáhkkit dárbbuid dákkár fálaldagaide unnut, go boares olbmot lassánit jagis jahkái. Dan dieđus diehtá suohkan maid bures, go dat gohčoduvvon vuorrasiidbárru lea juo dieđihuvvon máŋga logi jagi dás ovdal. Eat dieđe man bures suohkan lea dasa ráhkkanan, muhto ii oro goit beare bures go eai nagot šat fállat dohkálaš bálvalusaid boarraseamos ássiide. Lea ge dehálaš mearridit guovddáža bisovažžan, go de han lea dohko álkit oažžut fástabargiid. Eará bealli lea maid dat ahte šaddet ovddas guvlui plánet suohkanekonomiija dan doaimma mielde.
Dat daidá leat dušše heahtečoavddus, nu ahte fertejit geahččat ain ovddas guvlui.
Suohkanat fertejit vuhtiiváldit vuorasolbmuid. Sis galgá boarásnuvvan beivviin dat oadjebasvuohta ahte sidjiide lea sadji dearvvašvuođaguovddážis dahje sullasaš ásahusain go eai birge šat iehčanassii. Ovddasvástádus gullá njuolga politihkkáriidda geat stivrejit ja vuoruhit ruđaid suohkandoaimmaide. Boaresolbmuid ii sáhte beare «bálkestit iehčanassii» go gieldda ruhtaseahkka lea guoros. Danne vuordit ahte politihkkárat čovdet dán heahtedili. Dan luohttámuša lea álbmot addán politihkkáriidda válggaid bokte. Guovdageainnu politihkkárat leat čájehan dál ahte sis lea dáhttu čoavdit dán heahtedili, go rahpe Máze ássan- ja bálvalusguovddáža . Dat daidá leat dušše heahtečoavddus, nu ahte fertejit geahččat ain ovddas guvlui. Áidna čoavddus lea lasihit sajiid gos boarrásat sáhttet orrut. Dat dieđus máksá, muhto maid de? Lea aŋkke «divraseabbo» hilgut min boarrásiid loahpageahčen sin eallima, ja ráhkadit dakkár gova ahte sii leat dušše gollun. Dan eat dohkket.