BOHTOSIIGUIN
Duhtavaččat iežaset Kárášjoga Vuodjansearvi finai mannan vahkkoloahpa Svalbárddas vuodjamin gilvvu Svalbard Isfjord Svøm 2022 vuodjamiin. Nuorat leat birgen bures.
Svalbard Isfjord Svøm 2022 vuodjamiin gilvaledje 69 vuoddji ja ovddastedje Álttá, Ánddasullo, Gielkká, Hársttáid, Svolvaer ja Svalbárdda. Vuodjamiid duopmárat ja čállingoddi bohte Romssa biirres ja Nordlándda, Romssa ja Finnmárkku vuodjanservviin. Kárášjoga vuoddjit riegádan 2007, 2008 ja 2002 birgejedje bures eará vuodjanservviid ektui.
– Muhtumat buoridedje iežaset áiggi muhtin vuodjanvugiin. Sii vudje nu leahtuin go mii leimmet vuordán. Jonas Mortelmans Somby vuojai muhtin vuodjanvuogis johtilabbot go goassege ovdal. Muhto son ii buoridan 100 mehtera friddjavuodjimis áiggi vaikko lei buoremus áigi. Jonas gal lei duđavaš olahusain dan ektui maid lea hárjehallan. Go ii leat šaddan nu olu hárjehallat, de ii sáhte vuordit nu olu ge, lohká Kárášjoga vuodjansearvvi jođiheaddji Katri Mortelmans Somby.
Jođiheaddji Somby muitala ahte dat nieiddat vázzet ovttas skuvllas ja leat álo ovttas.
Buoremus vuoddji
Frid Bratlien Danielsen, riegádan 2002, lea ovddastan Kárášjoga vuodjansearvvi sullii vihtta jagi.
– Son ássá dál Kirkonjárggas ja deavdá dál 20 jagi. Son háliidii vuolgit fárrui. Su eadni, Trude Bratlien, lei mielde duopmárin, ja ieš lei vuoddji, ja su áhčči turistii, lohká Somby.
– Frid vuittii maid buoremus vuoddji vuoittu luohkás 2006 ja boarrásat. Son lea vuodjan njealji iešguđet gaskka ja das lohket čuoggáid. Son guhte olaha eanemus čuoggáid, vuoitá buoremus vuoddji vuoittu, lohká Somby.
Tinen ruđaid mátkái
Jearaldahkii lea go Kárášjoga Vuodjansearvi máksán buot mátkegoluid, muitala Somby ahte Kárášjoga vuodjansearvi lea ovtta oasi máksán mátkegoluin, muhto oasseváldit fertejedje ieža veaháš máksit iežaset ovddas.
– Nuorat leat tinen ruđaid go lea bassan dáluid Kárášjogas. Dien láhkai leat nuorat čoaggán alcceseaset ruđaid. Ieža leat bargan, searvi lea veaháš juolludan ja de lea ieža velá máksán iešmávssu, lohká Somby.
Háliidedje oaidnit jiekŋaguovžža
Ovdal go vulge Kárášjogas, de muitalii jođiheaddji ahte sii leat bovdejuvvon fanasmátkái ja soitet maid oaidnit jiekŋaguovžža jus lea lihkku. Somby muitala ahte Kárášjoga vuodjansearvi lea idjadan Svalbárdda nuoraidklubbas mii buohkaid mielas lei hui somás idjadanbáiki.
– Eat mii oaidnán ealli jiekŋaguovžža, muhto Svalbárdda museas oinniimet devdojuvvon jiekŋaguovžža ja valjis govaid. Muhto fanasmátkkis sotnabeaivvi oinniimet bossu vuonas. Soaitá boahtte háve, lohká Kárášjoga vuodjansearvvi jođiheaddji Katri Mortelmans ja muitala sii leat aiddo lea lávkemin girdái mii manná Romsii.