– Eat leat duhtavaččat fálaldagain
NBR jođiheaddji cuiggoda stáhta čállinvuogi fálaldagas, iige loga iežaset veahášge duhtavažžan fálaldagain.
Mannan bearjadaga geigii stáhta šiehtadallanlávdegoddi stáhta boazodoallošiehtadusa 2023/2024 fálaldaga, mas fállet 188 miljovnna boazodollui, mii lea 8 miljovnna lasáhus dálá šiehtadusas.
Árabut dán mánu de geigii Norgga Boazosápmelaččaid Riikkasearvi (NBR) iežaset gáibádusa. NBR gáibádus lea oktii
buot 259,7 miljovnna ruvnno. Dat lea 79,7 miljovnna lassáneapmi dálá šiehtadusa ektui.
NBR jođiheaddji Inge Even Danielsen ii leat duđavaš stáhta fálaldagain.
– Lean beahtahallan ekonomalaš rámma dihtii maid stáhta ovdanbuktá, erenomážit go smiehtan man mearehis olu eanandoallu oaččui, masa stáhta lasihii rámma mealgat doahttalan dihtii haddegoargŋuma. Mii diehtit ahte boazodoalu gollodássi lea maid lassánan seamma olu. Dán jagaš fálaldat lea beare heittot, dadjá son.
Unohis čállinvuohki fálaldagas
Inge Even Danielsen lohká váttisin geassit ovdan buriid stáhta fálaldagas, go obbalohkái ii loga liikot vuogi mo fálaldat lea čállon.
– Lea váttis čilget maid oaivvildan, ferten váruhit ahte in geavat boasttu sániid. Mu mielas orru fálaldagas vuhttomin ahte stáhta viggá dego oahpahit min, mii ii leat gal buorre. Ii leat heivvolaš čállinvuohki fálaldagas. Dađi eambo in háliit kommenteret dan, lohká Inge Even Danielsen.
Boazodoalloláhka
Inge Even Danielsen muitala ahte sii leat maid beahtahallan das go ollislaččat geahčadit boazodoallolága.
– Seammás lean beahtahallan go stáhta šiehtadallanlávdegoddi ii leat vástidan makkár hoidu ráđđehusas lea geahčadit ollislaččat boazodoallolága, dadjá son.
Gáibidit vástádusaid
NBR áigu dál siskkáldasat meannudit stáhta fálaldaga, ja dan oktavuođas muitala Inge Even Danielsen ahte jus galgá vuođđu viidásat
šiehtadallamii, de ferte stáhta moadde gažaldaga vástidit.
– Mii leat ožžon signálaid báikkálaš servviin ahte sii leat maid beahtahallan, ja dan gal maid čájeha sturrodat erohusas maid gáibidat ja dan maid stáhta fállá. Mii leimmet vuordán stuorát ekonomalaš rámma, 8 miljovnna ruvnno lea beare heittot, dadjá Danielsen.