Eambbo galledeaddjit go goassige ovdal
Badjelaš 68 000 čájáhusguossi gallededje Sámemusea ja DavviLappi luondduguovddáža Siidda diibmá.
Guosselohku lea seamma dásis, ja vel badjelis ge go ovdal koronapandemiija jagiid. 2023 čájáhusaid fitne guhtta proseantta eanet guossit geahččamen go bivnnuheamos jagi 2019. Gallededdjiid lohku lassánii 33 proseanttain 2022 ektui.
Ollu guossit
Siidda uksalohkki coahkehii badjel 138 000 geardde.
Maiddái olbmot geat fitne Meahciráđđehusa Davvi-lappi luondduguovddáža áššehasbálvalusas, Anára gieldda turismarávvenbáikkis, restoráŋŋa Sarrihis ja Siida Shop -museagávppis rehkenastojit čájáhusgussiid lassin.
– Oinniimet ovttaskas olahusbeaivvi ruškki 2023 áigge, go čakčamánus ovtta beaivvis fitne čájáhusaid oaidnimin badjel 850 guossi, mii lei badjel 200 olbmo eanet go ovddit olahusbeaivvi, čállá Siida preassadieđáhusas.
Oallugat geahččan váldočájáhusa
Dat ahte máilbmi rahpasii fas mátkkošteapmái ja bivnnuhis, ođasmahtton váldočájáhus «Enâmeh láá mii párnááh – Nämä maat ovat lapsiamme» váikkuhit čielgasit guosselogu lassáneapmái. Ođđa váldočájáhusa leat rahpandoaluid maŋŋá oktiibuot 113 000 čájáhusguossi oaidnán.
– Lea movttegis ášši, ahte ođasmahtton Siiddas leat galledan eambbo olbmot go goassige ovdal. Dat, ahte sámit ieža muitalit kultuvrraset birra ođđa váldočájáhusas, čuohcá čielgasit maiddái váldoálbmogii ja turisttaide, lohká Sámemusea Siidda museahoavda
Taina Pieski.
– Čájáhus movttiidahttá olbmuid davás Lappi lundui. Guosselogut muitalit ollislaččat turismma mearis guovllus ja ahte guossit dárbbašit máŋggabealat bálvalusaid ja maiddái dárkilis dieđu luonddus ja guovllus johtimii. Dán bálvalusa sii ožžot seamma dálus erenomáš čájáhusvásáhusa lassin, cealká virkkosmananu sierraáššedovdi
Tarja Tuovinen Meahciráđđehusas.
Miehtá máilmmi
Sullii 42 proseantta čájáhusgussiin ledje suopmelaččat. Olgoriikalaš turisttaid lohku lea máhccamin seamma dássái go ovdal pandemiija. Eanemusat olgoriikalaš guossit leat boahtán Duiskkas ja Fránskkas, muhto galledeaddjit
maiddái Hong Kongas ja Austrálias leat fas álgán dihttot moatte jagi bottu maŋŋá.
Oahpistemiid lohku lea lassánan issoras olu ođđa čájáhusa geažil. 2023:s lágidedje 400 oahpisteami, viđa iešguđetge gillii. Ovddit bivnnuheamos jahki oahpistemiid dáfus lei 2019. Dalle lágidedje 292 oahpisteami.
Sámemusea
Siidda Nuortalaččaid árbevierrodálus Čeavetjávrris fitne 2023:s 1311 guossi. 30 proseantta buot galledemiin árbevierrodálus ledje čakčamánus.