Andreas Gundersen lea dán jagáš viessokomponista
Diimmá Sámi Grand Prix vuoiti lea jahkái virgáduvvon dánin, ovtta stuorámus dáiddamuseas ja komponistabáikkis Davviriikkain.
KODE Dáiddamusea ja komponistabáiki lea nammadan Andreas Gundersena dán jagáš viessokomponistan.
Gundersen lea nubbi artista dan Deanu duos mii vuittii Sámi Grand Prix lávlunoasi 2023:s «Ale guođe mu»- lávlagiin. Son lea sámi pianista ja komponista, riegádan
1993:s ja šaddá nuoramus viessokomponistan mii Kodes lea leamaš dán rádjai.
– Gundersena musihkka lea gelddolaš, garas, máŋggabealat ja ohcaleaddji, ja mii illudit ovdanbuktit miellagiddevaš dáiddára gii lea álggus iežas bargoeallimis, dadjá Kode komponistabáikki direktevra Christian Grøvlen preassadieđáhusas.
Juohke jagi virgáda Kode ođđa viessokomponistta, loktendihte dálá áiggi komponisttaid. Juohke komponisttas lea iežas vuohki movt hábme jagi. Andreas Gundersen lea sin njealját viessokomponista.
Su ovdal leat leamaš Wolfgang Plagge (2021), Rebecka Sofia Ahvenniemi (2022) ja Ørjan Matre (2023).
– Sámi kultuvra šaddá dehálaš
Kode lea okta dain stuorimus dáidda- ja musihkkamuseain ja komponistabáikkiin Davviriikkain.
– Bull, Grieg ja Saeverud hábmejedje buohkat iežaset barggu Norgga álbmotmusihka vuođul. Andreasa dáiddabargu lea vuođđuduvvon sámi kultuvrii, ja dál son ovddida dan árbevieru
min áigái. Geahččit besset illudit dan vásihit, lohká Grøvlen preassadieđáhusas.
Son čilge viidáseappot ahte dán jagi beassá Gundersen váikkuhit musea prográmmii go hábme konsearttaid ja doaluid iežas jurdagiid ja višuvnnaid mielde. Viessokomponista galgá maiddái komponeret áibbas ođđa barggu, mii ovdanbuktojuvvo Kodes loahpageahčen jagi.
– Áŋgiris komponista Deanus
Maŋŋil go Andreas Gundersen gearggai oahpuin Norgga musihkkaallaskuvllas
(NMH), fárrii son Oslos ruovttoluotta Detnui, gos dál orru ja bargá komponistan ja čuojaheaddjin. Son lea álggahan ođđa ovttasbargguid artisttaiguin, čuojaheddjiiguin ja komponisttaiguin davvin, ja erenoamážit Sámis.
2023:s son álggii Árktalaš Filharmoniija dáiddalaš ráđđeaddivirgái sámi ja kvena musihkas.
Viessokomponistta 2024 prográmma almmuhuvvo giđa mielde, čállá Kode.