Áiguba juonaiguin giktalit Porsáŋggu fárrui
Mannan duorastaga čoahkkanedje Kárášjoga ja Guovdageainnu ovdagoddemiellahtut vuosttaš oktasaš ovdagoddečoahkkimii. Buohkat illudit ovttasbargui, muhto guovttis sávvaba vel ovtta kránnjágieldda fárrui.
Guovdageainnu suohkan ja Kárášjoga gielda leat mearridan ovttasbargat, ja duorastaga deaivvadedje vuosttaš oktasaš čoahkkimii. Áigumuš lea nannet dan ovttasbarggu mii dál lea jođus, ja oahpásnuvvat.
Illudit ja gealdagasas
Guovdageainnu sátnejođiheaddji Anders S. Buljo rabai čoahkkima ja sávai buohkaide buresboahtima. Dasto son siđai buot ovdagoddemiellahtuid fitnat sárdnestuolus muitaleame geat sii leat. Johan Vasara ja Kárášjoga sátnejođiheaddji, Svein Atle Somby maid leaba ovdagottis, muhto eaba sáhttán searvat čoahkkimii.
Jus galgá jáhkkit sániide mat bohte sárdnestuolus, de leat buohkat gergosat ovttasbargui ja illudit dasa.
Buljo muitala Ávvirii ahte su vuordámušat ovttasbargui lea nannet fágabirrasiid ja bálvalusaid guovtti gieldda ektui. Son maid vuordá ovdáneami.
Kárášjoga várresátnejođiheaddji, Mathis Nilsen Eira, lea ovttaoaivilis Buljoin ja lasiha ahte leat olu suorggit mainna sáhttet ovttasbargat, ahte lea dušše dáhtu vuolde.
– Muhto ferte ovtta sajis álgit dáinna ovttasbargguin, ja dat lea nu mo odne, gulahallat ja oahpásnuvvat, muitala Eira.
Ávkin álbmogii
Buljo ja Eira jáhkkiba ahte ovttasbargu lea ávkin sihke álbmogii, muhto maiddái ealáhusaide, go dál lea stuorát deaddu mearrádusain.
– Ovttasbargu nanne ja gievruda stuorát dásis, muitala Buljo ja lasiha ahte ovttasbarggu mearrádusat sáhttet leat ávkin eará sámi suohkaniidda.
Son maid muitala ahte vaikke dál leat almmolaččat álgán ovttasbargat, de lea Kárášjohka ja Guovdageaidnu ovttasbargan ovdalaččas ja namuha biergohaddeloktema ovdamearkan.
Eira ges muitala ahte ovttasbarggus galgá leat rabasvuohta. Álbmot ja servodat galget diehtit mii dáhpáhuvvá, mii mearriduvvo čoahkkimiin. Son ii loga áigut čiehkat mii hállo sin gaskkas.
Guovddáš sámi guovllut
Eira ja Buljo eaba čiegat ahte oččodeaba maid ovttasbarggu maiddái Porsáŋggu gielddain. Eira muitala ahte sámi suohkaniid ovttasbargu lea dehálaš, ja jáhkká ahte šattašii buorre jus oččošedje Porsáŋggu fárrui, muhto maiddái háliida Deanu ja Unjárgga searvái.
– De leat guovddáš sámi guovllut ovttasbargamin. Muhto dieđus jus dát galgá ollašuvvat, de ferte rabasvuohta. Rabas koarttaiguin galgá speallat, muitala Eira.
– Dat lea oainnat nu ahte Porsáŋgu sáhttá leat miellahttun guovtti politihkalaš ráđis, eai dárbbaš guođđit ovtta vai besset nubbái. Máhtte mii lea Porsáŋggus gesiid, dovdá poršaŋggulaččaid ja lohká ferte atnit juonaid go giktala sin, loahpaha Buljo.