Mari Boine lea gáhttadáiddan
– Lávlu ja aktivista Mari Boine lea našunáladávvir, dadjá Gurdish Haugsdal Ávvirii. Son lea ráhkadan «street art» -dáidaga ikonalaš sámi artisttas Bergenis. Dál lea dat girjehámis.
Girji «Spasere, promenere, spankulere og observere - 14 turer i Bergen for lave skuldre og behagelig puls» lea leamašan okta dain bivnnuheamos girjjiin stuora Bergen-gávpoga birra Vestlánddas 2023:s. Girjjis leat beakkán veahkkečállit nu go Gunnar Staalesen ja Truls Synnestvedt.
Kari Amble lea dan bivnnuhis girjji váldodoaimmaheaddji. Son lea ovdalaččas earret eará 20 jagi bargan journalistan NRK:S.
– Mun lean hirbmat ilus go Gurdish Haugsdal háliidii čállit su vázzintuvrra birra min girjái, go de mii beasaimet čalmmustahttit daid nissonolbmuid geaid son lea njuohtan, earret eará Mari Boine. Mii sávvat ahte girji movttiidahttá lohkkiid geahččat birraseaset váccidettiin – ja ložžet olggiid. Go vázzet ja oidnet Mari Boine gova njuhttojuvvon seaidnái ovtta Bergena gáhtain, de sávvat ahte sii bisánit, gehččet gáhttadáidaga ja jurddašit Boine erenoamáš barggu birra sámi musihkain ja kultuvrrain, dadjá Amble Ávvirii.
Nanu ovdagovva
Dáiddár Gurdish Haugsdal lea maid guovddážis girjjis, ja lea čállán kapihttala vázzintuvrra birra, «My street Art walk». Ášši Mari Boine gráfalaš gudnejahttima birra lea olles guokte siiddu dan kultuvrralaš mátkkoštanofelaččas. Art designer ja gáhttadáiddár, Gurdish Haugsdal, lea čállán dan vázzintuvrra birra, «My street Art walk» oasis girjjis.
Gáhttadáiddár ja designár Londonis eret lea dovdoseamos artistanamain Dish, ja son orru dán áigge Bergenis. Dan ivdnás gova Boines son máŋge ja juohká eará street art -dáiddáriidda geaiguin sus lea oktavuohta, ja muhtun dáiddárat geat suinna leat váldán oktavuođa leat heŋgon gáhttadáidaga Osloi, Troandimii, Londonii ja Parisii.
Son lea guhká juo beroštan dan
Finnmárkku artisttas.
– Álggahin prošeavtta 2021:s mas njuhttegohten ikonalaš nissonolbmuid Bergen-guovllus, ja čalmmustahtten nanu feminiidna ovdagovaid vássánáiggis dálááigái, ja mun guorahalan dan identitehta, karakteara ja givrodaga maid servodat oažžu nissonlaš oktavuođain, čilge Haugsdal.
– Čoakkáldagas fertii leat maid Mari Boine, ja mun sávan ahte eambbosat gullet dan maid son muitala. Iežas sajádagain lea son vuostálastán eamiálbmogiid ja minoritehtaid duolbmama máilmmidásis, seammás go lea lokten dihtomielalašvuođa nissonolbmuid vuoigatvuođaid birra. Mari Boine ávvuda ilus dan ahte bajásšaddat dakkár kultuvrras mas leat lagas oktavuođat luondduin, ja son lea ovdamearkan nissonolbmuide geat háliidit atnit jienaset juoga maid nu buorideapmái.
Haugsdalas lei alddis nu lihkku ahte beasai oaidnit Boine doallame garra sártni, nu gohčoduvvon TEDTALK, Ole Bull lávddis Bergenis, gos son humai birrasa ja bajásšaddama birra Davvi-norggas.
– Lei sakka movttiidahtti sárdni ja ovdanbuktin mii attii munnje liige vuoimmi hábmet juoidá mii lea liikká čáppat ja fámolaš go maid su sánit ledje munnje, lasiha Haugsdal.
Dehálaš diehtu
– Son lea movttiidahttán nuorra buolvva vuovdnás sámi aktivisttaid, geat duođai leat namuhan veara, dat lea maid mu mielas miellagiddevaš. Mu vuohki árvvusatnit Mari Boine lea atnit gáhta lávdin mii gaskkusta sihke su ja eará nissonolbmuid dieđuid, ja movttiidahttin dihte servodaga min birrasis oahppat vajálduvvan historjjáid, lohkák Haugsdal .
Sámás: Inger Máret Ánne E. Gaup