– Dáppe lea visot juo billistan
Boazodoalu gearggusvuođalávdegoddi lea almmuhan guohtunroasu muhtin boazodoalloguovlluide.
Johan Anders Oskal Meavkki/stuoranjárgga orohagas Romssas muitala ahte bivvalat mat ledje maŋŋel juovllaid ja mat dál leat fas, leat billistan guohtuma oalát. Temperatuvrrat leat rievddadan máŋgalot buolašgrádas viđa lieggagrádii ja šnjoarri arvin, ja nu leat guohtumat jikŋon. Sis ii leat šat eará vejolašvuohta go biebmat bohccuid.
– Dáppe gal juo billistedje dat bivvalat. Lei dan mađe čáhccás arvi ahte vumiin maid billistii. Gokko lei dan mađe gassa muohta, lea bodneskárta. Arvvii maid gitta várrečohkaide, ja dál leat alážat buot sarton. Dál ii leat báhcán šat guohtun, muitala Oskal Ávvirii.
Golmma orohagas guohturoassu
Romssa ja Finnmárkku Stáhtahálddašeaddji boazodoallodirektevra Torhild Gjølme muitala Ávvirii ahte boazodoalu gearggusvuođalávdegottis leat leamaš olbmot iskame guovlluid sihke Romssas ja Finnmárkkus. Dan vuođul leat julggaštan guohtunroasu golmma orohahkii Romssa boazodoalloguovllus.
Ođđajagimánu 10. beaivvi rájes celke guohtunroasu Stálonjárggas, 12. beaivvi rájes Sálliris ja Meavkkis ges ođđajagimánu 15. beaivvi rájes.
– Go virggálaččat lea celkon guohtunroassu, de sáhttet ohcat roassofoanddas ruđa biebmamii. Lea nu ahte orohagat geavahit álggos iežaset gearggusvuođafoandda. Go dat guorrana, de sáhttet ohcat ruđa Stáhtahálddašeaddjis. Mii vuoruhit daid máksit, ja dan dahkat dađistaga go bohtet ohcamušat, muitala Gjølme.
Guhkes lossa, dálvi vuordimis
Johan Anders Oskal lohká leamaš hirbmat buori guohtuma ovdal go bivvalat bohte, ja bohccot leat ain oalle buorit. Muhto lea dušše ođđajagimánnu, ja dálvi lea ain guhkki. Sii leat juo álgán fievrredit
fuođđariid ja biebmagoahtán juo guokte-golbma vahku áigi. Vai nagodit eanet biebmat, áigot dál sirdit ealu vehá lagabui biilaluotta.
– Lea hirbmat bargu gal, go mii fertet seahkain goaivut fuođđariid heargereagaide, ja dainna lágiin geasehit ealu lusa. Ii dáppe goastta obba seahkaiguin meahccái, go leat olu dakkár rámšo báikkit. Lea oalle vuodjámuš, ja go ná heajuda, álget bohccot maid eambbo vázzit. Dat lea gal bargu, muhto olmmoš gal bargá bohccuid dihte vaikko maid, ja ruđaid maid bidjá dasa vai bohccot eai nealggo, dadjá Oskal.
Čuohcá nahkáriidda
Leat leamaš máŋga goavvedálvvi maŋemus jagiid, go dálkkádat lea lássen guohtumiid. Johan Anders Oskal ballá ná dat šaddá dávjjit
ain ovddosguvlui, ahte dát šadda normála dillin ovddosguvlui.
– Gal dat lea nu váivi. Dat nu givssida, ja muhtomin lea nu ahte eai báljo boađe nahkárat ge. Biebman dat gal lea vuos okta, muhto lea divrras ja hirbmat lossa bargu. Heajos guohtun vuorjá ija beaivvi. Ja dál lea dušše ođđajagimánnu, ja diehtit juo ahte ii šatta buorre guohtun ovdal cuoŋománu loahpageahčen. Ii leat leaika jus ná galgá juohke jagi dás ovddosguvlui, dadjá Oskal Ávvirii.
Finnmárkkus maid oalle heitot
Oarje-finnmárkku dálveguohtumiin lea Stáhtahálddašeaddji dieđuid mielde maid hástaleaddji guohtundilli, muhto ii leat vel dássážii almmuhuvvon guohtunroassun doppe.
– Dán vahkku galget eanet
guovlluin finadit Oarje-finnmárkkus. De galgá heahtegearggusvuođalávdegoddi árvvoštallat lea go guohtunroassu, muitala Stáhta
hálddašeaddji direktevra Torhild Gjølme.