Illudit Dronnegii čájehit 360° filmmaid
Vaikko Bådådjos bosoda measta orkána, de leat dál olles leavttuin ceggeme ÁRRAN 360° lávu gos earret eará Majestehta Dronnet Sonja beassá geahččat ođđa filmmaid 360° formáhtas.
Dan oktavuođas go Bådåddjo lea Eurohpá kulturoaivegávpot 2024:s, de álggaha ÁRRAN 360° ođđa áigodaga. Áigodaga leat gohčodan 2.0 ja das čájehit vihtta áibbas ođđa filmma, 360° formáhtas.
Filmmat čájehuvvojit vuosttaš geardde ÁRRAN 360° lávus guovvamánu 3. beaivvi. Dáinna viđain ođđa 360° Sámi filmmain joatká Internationála Sámi filbmainstituhtta (ISFI) guorahallat 360° teknologiija.
Eksklusiiva čájálmas Dronnegii
Dronnet Sonja galleda vuosttaščájálmasa, ja lea vuosttaš guossi guhte beassá geahččat dan vihtta ođđa filmma.
– Álo go gonagaslaš guossi boahtá de ferte dakkár čielga áigeplána, measta minuvttas minuktii: geat leat mielde, gii dadjá maid, gii čohkká gokko ja nu ain. Sii háliidit hui dárkilit diehtit prográmma. Dál leat prográmmain geargan ja leat vuorddašeamen iluin dan beaivvi, dadjá Internašunála Sámi Filbmainstituhta direktevra Anne Lajla Utsi.
Son ii loga sis makkár ge liigedoaimmaid vaikko Dronnet boahtá ge sin guossái.
– Mii illudit hirbmosit ja dat mearkkaša hui ollu midjiide go Norgga Dronnet boahtá min lusa. Son válddii ieš oktavuođa minguin ja bivddii beassat oaidnit filmmaid. Son lea dáiddaberošteaddji olmmoš ja lea midjiide hui stuora dáhpáhus go son boahtá. Mii sápmelaččat atnit hirbmat árvvus su ja muđui ge gonagasbearraša go sii han leat álo doarjume min buot lágan áššiin, dadjá Utsi.
Dálki hástalussan
Ekstremadálki «Ingunn» lea maŋemus vahkku ollen Bådåddjoi ja yr.no dieđiha duorastaga olles
stoarpma – oarjedavádaga ja duos dás bosáda 38 mehtera sekunddas. Dat lea dagahan hástalusaid lávuid ektui ja lea ge mearriduvvon sirdit osiid sámi prográmmas Rådhusplassenis sisa Glasshusetii.
ISFI direktevra muitala ahte sii leat maid šaddan ohcat eará čovdosa ja stuora vistti gosa ceggejit ÁRRAN 360° lávu.
– Lea sáhka hirbmat stuora lávus, ja go diekkár biegga lea
dieđihuvvon de fertet jurddahit sihkarvuođa vuosttažettiin, dadjá Utsi.