Tine fertii sisafievrridit mielkki
Tine máksá miljárdda ruvnno eaiggádiidda, geat leat 8000 Norgga boandda. Seammás leat váivvis go fertejedje sisafievrridit mielkki danin go lei menddo unnán mielki.
Tine vuovdindietnasat lassánedje 6,6 proseanttain 2022 rájes 2023 rádjái, ja dienas šattai 26,5 miljárdda ruvnnu, boahtá ovdan Tine jahkedieđáhusas.
Oasit badjebáhcagis mannet dál ruovttoluotta boanddaide. Sii ožžot 77,3 evrre juohke lihttera mielkki ovddas maid leat buktán.
– Ferte nannet ekonomiija
Tine njuolggadusat addet vejolašvuođa ahte gaskal 50 ja 85 proseantta badjebáhcagis sáhttá juhkkojuvvot dan 8000 mielkebondii geat eaiggáduššet fitnodaga. Dán jagi evttoha stivra juohkit 85 proseantta badjebáhcagis eaiggádiidda, mii lea maksimála máksin, čállá Nationen.
– Dat váikkuha dasa ahte mii mielkeboanddat ain sáhttit buvttadit dearvvašlaš, lunddolaš ja dorvvolaš borramuša Norgga álbmogii. Soađi ja roasuid geažil máilmmis áddejit olusat man dehálaš Norgga borramušbuvttadeapmi olles riikkas lea. Dalle lea dehálaš nannet mielkeboandda ekonomiija boahtteáiggis, dadjá Tine stivrajođiheaddji Marit Haugen preassadieđáhusa bokte.
Norgga mielkegeavaheapmi njiedjá ain, muhto dat njiedjá unnit go vurdojuvvui, čállá Tine.
Bávččas sisafievrridit
Tine válddii sisa 1,29 miljovnna lihttera gusamielkki diibmá, mii lea 1,35 miljovnna lihttera unnit go ovddit jagi. Tine lea cuiggoduvvon go lea buvttaduvvon unnit mielki go dan maid márkan dárbbaša. Ovttasdoaibmaovttadagas lea ovddasvástádus márkanmuddemis ja dainna lágiin galgá sihkkarastit ahte lea balánsa gaskal márkana dárbbu ja daid meriid mat buvttaduvvojit. Dán dálvvi lea Tine šaddan sisafievrridit mielkki vai sáhtii gokčat dárbbu.
– Midjiide buohkaide, geat leat rámis das ahte buvttadit Norgga borramuša Norgga resurssaiguin, leat unnán áššit mat bávččagahttet eanet go dat ahte fertet sisafievrridit vai sáhttit gokčat mielkeváilevašvuođa. Ii ábut ahte lea 1 proseanttas sáhka. Dat lea heajos proseanta, čállá Haugen. (©NTB)