Gielddadirektevra galgá fuolahit ahte ávžžuhusat čuovvoluvvojit
Dárkkistanlávdegoddi lea guorahallan mo sihkarvuohta ja kvalitehta lea gieldda fuollavisttiin ja demeansafálaldagain. Dárkkistanlávdegoddi galggai guorahallat addá go Kárášjoga gielda rivttes fálaldaga biebmama dáfus, bátnedearvvašvuođas, geavaheaddjeváikkuheamis ja mo láhčet dili sidjiide geain lea demeansa.
Ávvir leage čállán áššiid Kárášjoga fuollavisttiid birra, go vuoras olbmuid oapmahaččat muitalit surgadis dáhpáhusaid ja mo gieldda deamansabuhcciid dilli lea. Stáhtahálddašeaddji gávnnai láhkarihkkumiid, ja maiddái bargit leat váidán lossa bargodili.
Hálddašanrevišuvnna raporta «Dikšun- ja fuolahusbálvalusat geavaheddjiide buhcciidruovttuin ja fuolahanásodagain» lea gárvvis, ja gielddastivra bivdá gielddadirektevrra fuolahit ahte raportta ja dárkkistanlávdegotti ávžžuhusat čuovvoluvvojit.
Dárkkistanlávdegoddi lea gávnnahan
Raporta lea čállon dieđuid vuođul mat leat vižžon gieldda dokumeanttain, nu go plánastrategiijas, olgguldas raporttain ja njuolggadusain, mat leat čállon 2021:s ja 2022:s. Raportavuođđun leat maiddái pasieantajournálat mat leat čállon gaskal miessemánu ja suoidnemánu 2022:s.
Revišuvnna váldokonklušuvdna lea ahte lea čielggas ahte journálat eai čállo nu mo galget. Dat lea maid dagahan váttisin guorahallat addá go gielda rivttes fálaldaga mii guoská boradeapmái ja bátnedearvvašvuhtii, mat čuvvot njuolggadusaid ja rutiinnaid.
Raporttas maid boahtá ovdan ahte Kárášjoga gielddas eai leat vuhtii váldán olbmuid geain lea demeansa ja sis eai leat fálaldagat mii lea heivehuvvon sidjiide – earret go sierra latnja buhcciidossodagas, gos ii galgga riedja.
Gielddastivra bivdá gielddadirektevrra raporteret čuovvoleami gielddastivrii dárkkistanlávdegotti bokte ovdal go guokte jagi leat vássán mearrádusa rájes.
Lassičuoggát ja rievdadusat
Anne Toril Eriksen Balto (Gb) logai sárdnestuolus ahte lei hui buorre go dát raporta dál lea boahtán gielddastivrii. Son logai ahte sus leat evttohusat lassičuoggáide ja rievdadusaide.
Son namuhii earret eará ahte gielda galggašii ásahit sierra geavaheadderáđi, mii galgá doaibmat sierra orgánan gielddas. Ráđđái fertejit maid biddjot sierra njuolggadusat.
Eriksen Balto maid logai ahte galggašii sihkkarastit demeanttaid sihkarvuođa, ja de lea dárbbašlaš ahte leat rivttes olbmot geain lea guoskevaš gelbbolašvuohta barggus. Daidda evttohusaide ii ožžon opposišuvdna doarjaga posišuvnnas, nu de hilgojuvvui ášši.
Eriksen Balto evttohii ahte galge rievdadit cealkaga «raporteret čuovvoleami gielddastivrii dárkkistanlávdegotti bokte ovdal go guokte jagi leat vássán mearrádusa rájes», ja baicce ahte galgá raporterejuvvot jagi siste. Dán evttohusa dorjo posišuvnnas.